The world's finest
Shayari & Poetry

suraj huun chamakne kaa bhi haq chaahiye mujh ko
main kohr mein lipTaa huun shafaq chaahiye mujh ko

Iqbal Sajid

vatan ke log sataate the jab vatan mein the
vatan ki yaad sataati hai jab vatan mein nahin

Anjum Manpuri

gham hai na ab khushi hai na ummid hai na yaas
sab se najaat paae zamaane guzar gae

Khumar Barabankavi

maarka garm to ho lene do khun-rezi kaa
pahle shamshir ke niche hamin jaa baiTheinge

Mir Taqi Mir

ai sanam vasl ki tadbiron se kyaa hotaa hai
vahi hotaa hai jo manzur-e-khudaa hotaa hai

Mirza Raza Barq

tu dariyaa hai to hogaa haan magar itnaa samajh lenaa
tire jaise kai dariyaa miri aankhon mein rahte hain

Nafas Ambalvi

zamin ki god mein itnaa sukun thaa 'anjum'
ki jo gayaa vo safar ki thakaan bhuul gayaa

Anjum Khaleeq

zinda ikaTThe ho rahe hain
lagtaa hai koi mar gayaa hai

Sarfraz Zahid

ek hijrat bhi kam nahin hoti
aankh kis kis ki nam nahin hoti

Aadil Muzaffarpuri

ab aadmi kuchh aur hamaari nazar mein hai
jab se sunaa hai yaar libaas-e-bashar mein hai

Bedam Shah Warsi

bahut nazdik aati jaa rahi ho
bichhaDne kaa iraada kar liyaa kyaa

Jaun Elia

'aslam' baDe vaqaar se degrē vasul ki
aur is ke baa'd shahr mein khvaancha lagaa liyaa

Aslam Kolsarii

intizaar aur dastakon ke darmiyaan kaTti hai umr
itni aasaani se to baab-e-hunar khultaa nahin

Saleem Kausar

ham jo pahle kahin mile hote
aur hi apne silsile hote

Salman Akhtar

shor din ko nahin sone detaa
shab ko sannaaTaa jagaa detaa hai

Saifuddin Saif

ab tu darvaaze se apne naam ki takhti utaar
lafz nange ho gae shohrat bhi gaali ho gai

Iqbal Sajid

aisi hi intizaar mein lazzat agar na ho
to do ghaDi firaaq mein apni basar na ho

Riyaz Khairabadi

marte hain aarzu mein marne ki
maut aati hai par nahin aati

Mirza Ghalib

aisaa nahin ki main koi gumnaam shakhs huun
sab jaante hain mujh ko main ik ‘aam shakhs huun

Aadil Muzaffarpuri

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

Irfan Sattar