miri 'aashiqi sahi be-asar tiri dilbari ne bhi kyaa kiyaa — A. D. Azhar

tujh se judaa hue to tiri yaad baDh gai
aazaad ho ke qaid ki mi'aad baDh gai

— A. D. Azhar

tu khvaab hi mein sahi aa ke khud javaab to de
bujhi bujhi si miri aarzu ko aab to de

— A. D. Azhar

na chheD ai shaikh ham yunhi bhale chal raah lag apni
tujhe to biviyaan sujhi hain ham bezaar baiThe hain

— A. D. Azhar

vo bulaate to hain mujh ko magar ai jazba-e-dil
shauq itnaa bhi na baDh jaae ki jaae na bane

— A. D. Azhar

thaa jis pe naaz kabhi ab vo aarzu na rahi
niyaaz-e-'ishq ki pahli si aabru na rahi

— A. D. Azhar

vo kahte hain kuchh der hai faisle mein
ki 'ushshaaq ki 'arziyaan aur bhi hain

— A. D. Azhar

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki

chaand ne taan li hai chaadar-e-abr
ab vo kapDe badal rahi hogi

— Jaun Elia

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri