shauq-e-manzil ham-safar hai jazba-e-dil raahbar — Ali Jawad Zaidi

ye dushmani hai saaqi yaa dosti hai saaqi
auron ko jaam denaa mujh ko dikhaa dikhaa ke

— Ali Jawad Zaidi

guftugu ke khatm ho jaane par aayaa ye khayaal
jo zabaan tak aa nahin paayaa vahi to dil mein thaa

— Ali Jawad Zaidi

jin hauslon se meraa junun mutmain na thaa
vo hausle zamaane ke meyaar ho gae

— Ali Jawad Zaidi

lazzat-e-dard mili ishrat-e-ehsaas mili
kaun kahtaa hai ham us bazm se naakaam aae

— Ali Jawad Zaidi

ab dard mein vo kaifiyat-e-dard nahin hai
aayaa huun jo us bazm-e-gul-afshaan se guzar ke

— Ali Jawad Zaidi

jab kabhi dekhaa hai ai 'zaidi' nigaah-e-ghaur se
har haqiqat mein mile hain chand afsaane mujhe

— Ali Jawad Zaidi

zindagi phaili hui thi shaam-e-hijraan ki tarah
kis ko itnaa hausla thaa kaun ji kar dekhtaa

— Ahmad Faraz

khirad vaalon ko kahne do ki hain saat aasmaan sar par
junun vaalo zaraa himmat karo bas ek ziinaa hai

— Ijtiba Rizvi

ai jazba-e-dil gar main chaahun har chiiz muqaabil aa jaae
manzil ke liye do gaam chalun aur saamne manzil aa jaae

— Behzad Lakhnavi

zindagi ko hausla dene ke khaatir
khvaahishon ko reza reza chun rahaa huun

— Mahfuzur Rahman Adil

tohmat-e-jurm-o-khataa hirs-o-havaa ghaflat-e-dil
ham ne baazaar se hasti ke liyaa kyaa kyaa kuchh

— Mirza Maseeta Beg Muntahi

khaak uchhaalo jo zamin par to falak par gir jaae
ab khulaa ye ki bahut past hai himmat meri

— Sohail Azeemabadi