sach ye hai ham hi mohabbat kaa sabaq paDh na sake — Anwar Jamal Anwar

shahr ki galiyon aur saDkon par phirte hain maayusi mein
kaash koi 'anvar' se puchhe aise be-ghar kitne hain

— Anwar Jamal Anwar

tumhaare dil mein koi aur bhi hai mere sivaa
gumaan to hai zaraa saa magar yaqin nahin

— Anwar Jamal Anwar

husn aisaa ki zamaane mein nahin jis ki misaal
aur jamaal aisaa ki DhunDaa kare har khvaab-o-khayaal

— Anwar Jamal Anwar

ham fitratan insaan hain farishte to nahin hain
daavaa ye karein kaise ki laghzish nahin karte

— Anwar Jamal Anwar

kaisaa maqaam aayaa mohabbat ki raah mein
dil ro rahaa hai meraa magar aankh tar nahin

— Anwar Jamal Anwar

daaman pe to har ek ke chhiTein hain khuun ki
ab kis se puchhiye ki gunahgaar kaun hai

— Anwar Jamal Anwar

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh

husn jalva dikhaa gayaa apnaa
ishq baiThaa rahaa udaas kahin

— Saifuddin Saif