ham se ziyaada kaun samajhtaa hai gham ki gahraai ko — Aziz Bano Darab Wafa

ahmiyat kaa mujhe apni bhi to andaaza hai
tum gae vaqt ki maanind ganvaa do mujh ko

— Aziz Bano Darab Wafa

main ne ye soch ke boe nahin khvaabon ke darakht
kaun jangal mein uge peD ko paani degaa

— Aziz Bano Darab Wafa

ek muddat se khayaalon mein basaa hai jo shakhs
ghaur karte hain to us kaa koi chehra bhi nahin

— Aziz Bano Darab Wafa

ham aise surmaa hain laD ke jab haalaat se palTe
to baDh ke zindagi ne pesh kiin baisaakhiyaan ham ko

— Aziz Bano Darab Wafa

main jab bhi us ki udaasi se uub jaaungi
to yuun hansegaa ki mujh ko udaas kar degaa

— Aziz Bano Darab Wafa

aaj kam-az-kam khvaabon hi mein mil ke pi lete hain, kal
shaayad khvaabon mein bhi khaali paimaane Takraaein log

— Aziz Bano Darab Wafa

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi