main jis mein rah na sakaa ji-huzuriyon ke sabab — Faryad Aazar

band ho jaataa hai kuuze mein kabhi dariyaa bhi
aur kabhi qatra samundar mein badal jaataa hai

— Faryad Aazar

main us ki baaton mein gham apnaa bhuul jaataa magar
vo shakhs rone lagaa khud hansaa hansaa ke mujhe

— Faryad Aazar

is tamaashe kaa sabab varna kahaan baaqi hai
ab bhi kuchh log hain zinda ki jahaan baaqi hai

— Faryad Aazar

subh hoti hai to daftar mein badal jaataa hai
ye makaan raat ko phir ghar mein badal jaataa hai

— Faryad Aazar

jo duur rah ke uDaataa rahaa mazaaq miraa
qarib aayaa to royaa gale lagaa ke mujhe

— Faryad Aazar

ham ibtidaa hi mein pahunche the intihaa ko kabhi
ab intihaa mein bhi hain ibtidaa se lipTe hue

— Faryad Aazar

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar