TuuT saktaa hai chhalak saktaa hai chhin saktaa hai — Idris Babar

pachaas miil hai khushki se bahriya-town
bas ek ghanTe mein achchhaa zamaana aataa hai

— Idris Babar

kahaaniyon ne miri aadatein bigaaDi thiin
main sirf sach ko zafar-yaab dekh saktaa thaa

— Idris Babar

dil ki ik ek kharaabi kaa sabab jaante hain
phir bhi mumkin hai ki ham tum se muravvat kar jaaein

— Idris Babar

reg-e-dil mein kai naadida parinde bhi hain dafn
sochte honge ki dariyaa ki ziyaarat kar jaaein

— Idris Babar

haan ai ghubaar-e-aashnaa main bhi thaa ham-safar tiraa
pi gaiin manzilein tujhe khaa gae raaste mujhe

— Idris Babar

ik khauf-zada saa shakhs ghar tak
pahunchaa kai raaston mein baT kar

— Idris Babar

jinhein ye fikr nahin sar rahe rahe na rahe
vo sach hi kahte hain jab bolne pe aate hain

— Aabid Adeeb

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

bagulaa jin ke sar par chatr-e-shaahi hai zamin masnad
vahi aqlim-e-gham mein aah ki naubat bajaate hain

— Siraj Aurangabadi

azaab-e-daanish-e-haazir se baa-khabar huun main
ki main is aag mein Daalaa gayaa huun misl-e-khalil

— Allama Iqbal

gulaabon ke honTon pe lab rakh rahaa huun
use der tak sochnaa chaahtaa huun

— Zubair Rizvi

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

— Abdul Wahab Sukhan