vahi aag apnaa nasib thi ki tamaam umr jalaa kiye — Ilyas Ishqi

koi qarya koi dayaar ho kahin ham akele nahin rahe
tiri justuju mein jahaan gae vahin saath dar-badari rahi

— Ilyas Ishqi

is uljhan ko suljhaane ki kaun si hai tadbir likho
ishq agar hai jurm to mujrim raanjhaa hai yaa hiir likho

— Ilyas Ishqi

vaqt aayaa to khuun se apne daagh-e-nadaamat dho leinge
saaya-e-zulf mein jaagne vaale saaya-e-daar mein so leinge

— Ilyas Ishqi

us ki baalak-haT ke aage ghar chhoDaa bairaag liyaa
dekhein kyaa din dikhlaataa hai ab ye murakh man baabaa

— Ilyas Ishqi

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

kisi se ishq apnaa kyaa chhupaaein
mohabbat Tapki paDti hai nazar se

— Meer Mehdi Majrooh