teri yaadon ki chamakti hui mashal ke sivaa — Jazib Quraishi

mujh ko baDe khulus se barbaad kar diyaa
'jaazib' kisi ne ek havas-kaar ke liye

— Jazib Quraishi

teri khushbu pyaar ke lahje mein bole to sahi
dil ki har dhaDkan ko ik chehra nayaa mil jaaegaa

— Jazib Quraishi

mire vajud ke khushbu-nigaar sahraa mein
vo mil gae hain to mil kar bichhaD bhi sakte hain

— Jazib Quraishi

daftar ki thakan oDh ke tum jis se mile ho
us shakhs ke taaza lab-o-rukhsaar to dekho

— Jazib Quraishi

kuchh mere dhaDakte hue dil ne bhi pukaaraa
kuchh aap ko baazaar mein dhokaa bhi huaa hai

— Jazib Quraishi

kyuun maang rahe ho kisi baarish ki duaaein
tum apne shikasta dar-o-divaar to dekho

— Jazib Quraishi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

koi viraani si viraani hai
dasht ko dekh ke ghar yaad aayaa

— Mirza Ghalib

phaDkun to sar phaTe hai na phaDkun to ji ghaTe
tang is qadar diyaa mujhe sayyaad ne qafas

— Shaikh Zahuruddin Hatim

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

— Saqib Lakhnavi