nae manzar ke khvaabon se bhi Dar lagtaa hai un ko — Khushbir Singh Shaad

bhanvar jab bhi kisi majbur kashti ko Dubotaa hai
to apni bebasi par duur se saahil taDaptaa hai

— Khushbir Singh Shaad

ye teraa taaj nahin hai hamaari pagDi hai
ye sar ke saath hi utregi sar kaa hissa hai

— Khushbir Singh Shaad

'shaad' itni baDh gai hain mere dil ki vahshatein
ab junun mein dasht aur ghar ek jaise ho gae

— Khushbir Singh Shaad

yahi qatre banaate hain kabhi to ghaas par moti
kabhi shabnam ko ye simaab mein tabdil karte hain

— Khushbir Singh Shaad

rafta rafta sab tasvirein dhundli hone lagti hain
kitne chehre ek puraane album mein mar jaate hain

— Khushbir Singh Shaad

ab andheron mein jo ham khauf-zada baiThe hain
kyaa kahein khud hi charaaghon ko bujhaa baiThe hain

— Khushbir Singh Shaad

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

— Imdad Imam Asar

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

par katar paai jab na khvaabon ke
band hi kar diin khiDkiyaan main ne

— Ameeta Parsuram Meeta

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

— Sandeep Gupte