har shai lamhe ki mehmaan hai kyaa gul kyaa khushbu — Manzoor Arif

baat teri suni nahin main ne
dhyaan meraa tiri nazar par thaa

— Manzoor Arif

vo kyaa gayaa ki har ik shakhs rah gayaa tanhaa
usi ke dam se thiin baaham rifaaqatein saari

— Manzoor Arif

aisaa dil-kash thaa ki thi maut bhi manzur hamein
ham ne jis jurm ki kaaTi hai sazaa zindaan mein

— Manzoor Arif

jhaankte raat ke garebaan se
ham ne sau aaftaab dekhe hain

— Salman Akhtar

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shor din ko nahin sone detaa
shab ko sannaaTaa jagaa detaa hai

— Saifuddin Saif

baat vo aadhi raat ki raat vo puure chaand ki
chaand bhi ain chait kaa us pe tiraa jamaal bhi

— Parveen Shakir

shab ko aa kar vo phir gayaa haihaat
kyaa isi raat ham ko sonaa thaa

— Nazeer Akbar Abadi

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

— Aziz Nabeel