saat aasmaan ki sair hai pardon mein aankh ke — Mazaq Badayuni

zabaan par aah rahi lab se lab kabhu na milaa
tiri talab to mili kyaa huaa jo tu na milaa

— Mazaq Badayuni

ham se vahshi nahin hone ke giraftaar kabhi
log divaane hain zanjir liye phirte hain

— Mazaq Badayuni

vaaiz buton ke aage na furqaan nikaaliye
surat se un ki maani-e-quraan nikaaliye

— Mazaq Badayuni

nikal gayaa miri aankhon se misl-e-khvaa-o-khayaal
guzar gayaa dil-e-raushan se vo nazar ban kar

— Mazaq Badayuni

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi