musalmaan thaa magar teri adaa-e-fitna-parvar ne — Muzaffar Ahmad Muzaffar

hazaaron baar sinchaa hai ise khun-e-rag-e-jaan se
taajjub hai mire gulshan ki viraani nahin jaati

— Muzaffar Ahmad Muzaffar

main jab bhuke parinde dekhtaa huun apne aangan mein
mujhe apne vatan ke nange bachche yaad aate hain

— Muzaffar Ahmad Muzaffar

ham talkhi-e-hayaat ko aasaan na kar sake
sahraa-e-zindagi ko gulistaan na kar sake

— Muzaffar Ahmad Muzaffar

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq