shaamil huun qaafile mein magar sar mein dhund hai — Rajinder Manchanda Bani

yaad tiri jaise ki sar-e-shaam
dhund utar jaae paani mein

— Rajinder Manchanda Bani

thi paanv mein koi zanjir bach gae varna
ram-e-havaa kaa tamaashaa yahaan rahaa hai bahut

— Rajinder Manchanda Bani

koi bhuli hui shai taaq-e-har-manzar pe rakkhi thi
sitaare chhat pe rakkhe the shikan bistar pe rakkhi thi

— Rajinder Manchanda Bani

paiham mauj-e-imkaani mein
aglaa paanv nae paani mein

— Rajinder Manchanda Bani

vo TuTte hue rishton kaa husn-e-aakhir thaa
ki chup si lag gai donon ko baat karte hue

— Rajinder Manchanda Bani

mohabbatein na rahin us ke dil mein mere liye
magar vo miltaa thaa hans kar ki vaza-daar jo thaa

— Rajinder Manchanda Bani

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

yaad aai hai to phir TuuT ke yaad aai hai
koi guzri hui manzil koi bhuli hui dost

— Ahmad Faraz

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

— Ada Jafarey

yuun to maujud apne ghar mein hai
aadmi mustaqil safar mein hai

— Saleem Amrohvi

dimaagh un ke tajassus mein jism ghar mein rahaa
main apne ghar hi mein rahte hue safar mein rahaa

— Anjum Siddiqui