sab ki nigaah mein tire godaam aa gae — Tanveer Sipra

main apne bachpane mein chhu na paayaa jin khilaunon ko
unhi ke vaaste ab meraa beTaa bhi machaltaa hai

— Tanveer Sipra

kitnaa buad hai mere fan aur peshe ke maabain
baahar daanish-var huun lekin mill mein oil-man

— Tanveer Sipra

dihaat ke vajud ko qasba nigal gayaa
qasbe kaa jism shahr ki buniyaad khaa gai

— Tanveer Sipra

mill maalik ke kutte bhi charbile hain
lekin mazduron ke chehre piile hain

— Tanveer Sipra

teri to aan baDh gai mujh ko navaaz kar
lekin miraa vaqaar ye imdaad khaa gai

— Tanveer Sipra

kabhi apne vasaael se na baDh kar khvaahishein paalo
vo paudaa TuuT jaataa hai jo laa-mahdud phaltaa hai

— Tanveer Sipra

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir