kyaa ajab log the guzre hain baDi shaan ke saath — Tariq Qamar

jaise mumkin ho in ashkon ko bachaao 'taariq'
shaam aai to charaaghon ki zarurat hogi

— Tariq Qamar

is lahje se baat nahin ban paaegi
talvaaron se kaise kaanTe nikleinge

— Tariq Qamar

phir aaj bhuuk hamaaraa shikaar kar legi
ki raat ho gai dariyaa mein jaal Daale hue

— Tariq Qamar

koi shikva na shikaayat na vazaahat koi
mez se bas miri tasvir haTaa di us ne

— Tariq Qamar

mizaaj apnaa milaa hi nahin zamaane se
na main huaa kabhi is kaa na ye zamaana miraa

— Tariq Qamar

saath hone ke yaqin mein bhi mire saath ho tum
aur na hone ke bhi imkaan mein rakkhaa hai tumhein

— Tariq Qamar

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

gayaa bachpan shabaab aayaa buDhaapaa aane vaalaa hai
magar main to abhi tak aap ko bachcha samajhtaa huun

— Boom Merathi

sunti rahi main sab ke dukh khaamoshi se
kis kaa dukh thaa mere jaisaa bhuul gai

— Fatima Hasan

kaise aataa hai dabe paanv gunaahon kaa khayaal
kitni khaamoshi se darvaaza khulaa thaa pahle

— Fay Seen Ejaz

jab us ne miraa khat na chhuaa haath se apne
qaasid ne bhi chipkaa diyaa divaar se kaaghaz

— Peer Sher Mohammad Ajiz