nahin maalum kyaa hikmat hai shaikh is aafrinash ki — Tek Chand Bahar

vahi ik aasmaan hai jis ko ham tum taar kahte hain
kabhi tasbih kahte hain kabhi zunnaar kahte hain

— Tek Chand Bahar

kahte hain andalib-e-giraftaar mujh ko dekh
ummid jivne ki nahin is bahaar mein

— Tek Chand Bahar

naaz be-jaa o lutf be-mauqaa
dilbaron ki adaa hai kyaa kyaa kuchh

— Tek Chand Bahar

hamein vaaiz Daraataa kyuun hai dozakh ke azaabon se
maaasi go hamaare besh hon kuchh maghfirat kam hai

— Tek Chand Bahar

jinhein ye fikr nahin sar rahe rahe na rahe
vo sach hi kahte hain jab bolne pe aate hain

— Aabid Adeeb

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

us ko sochun to dhyaan mein mere
khushbu aati hai pahli baarish ki

— Vibha Jain 'Khwaab'

us ke rukhsaar pe hai aur tire honT pe til
tilmilaane ki ijaazat nahin di jaaegi

— Inayat Ali Khan

sunaa hai vo mire baare mein sochtaa hai bahut
khabar to hai hi magar mo'tabar zyaada nahin

— Zafar Iqbal

azaab-e-daanish-e-haazir se baa-khabar huun main
ki main is aag mein Daalaa gayaa huun misl-e-khalil

— Allama Iqbal