raste se miri jang bhi jaari hai abhi tak — Yasmeen Hameed

ek divaar uThaai thi baDi ujlat mein
vahi divaar giraane mein bahut der lagi

— Yasmeen Hameed

parda aankhon se haTaane mein bahut der lagi
hamein duniyaa nazar aane mein bahut der lagi

— Yasmeen Hameed

jis samt ki havaa hai usi samt chal paDein
jab kuchh na ho sakaa to yahi faisla kiyaa

— Yasmeen Hameed

apni nigaah par bhi karun e'tibaar kyaa
kis maan par kahun vo miraa intikhaab thaa

— Yasmeen Hameed

us imaarat ko giraa do jo nazar aati hai
mire andar jo khanDar hai use taamir karo

— Yasmeen Hameed

musalsal ek hi tasvir chashm-e-tar mein rahi
charaagh bujh bhi gayaa raushni safar mein rahi

— Yasmeen Hameed

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

dil ki zakhmon ko kiyaa kartaa hai taaza har-dam
phir sitam ye hai ki rone bhi nahin detaa hai

— Zafar Anwar

zindagi zor hai ravaani kaa
kyaa thamegaa bahaav paani kaa

— Abdul Hamid Adam

dil mein rakh zakhm-e-navaa raah mein kaam aaegaa
dasht-e-be-samt mein ik hu kaa maqaam aaegaa

— Zafar Ghauri