ham ko jānāñ is nagrī meñ chalnā bhī dushvār huā — All Writings Of Aabid Jafri

"gul sadāqat se mahakte hue tāsīr meñ rakh sāneha dil pe jo guzre vahī tahrīr meñ rakh tāq-e-zindāñ meñ charāġh-e-ġham-e-hastī na jalā ātish-e-ishq-e-darūñ halqa-e-zanjīr meñ rakh ḳhisht-e-be-faiz jo ārāsta guftār meñ hai us ko buniyād banā kar kisī ta.amīr meñ rakh zulmatoñ se kisī ghar kī nahīñ hotī pahchān sang-o-gul hī nahīñ kuchh nuur bhī jāgīr meñ rakh kab talak dosh pe ḳhvāboñ ke karegā parvāz ham-nashīñ azm-e-safar vādī-e-tā'bīr meñ rakh diid kī ziist se tā-marg talab aa pahuñchī hīla-jū aur bahāne tū na tāḳhīr meñ rakh sarvarī zor-e-takallum se na mil pā.egī ham-nashīñ ijz-e-bayāñ ḳhūbī-e-taqrīr meñ rakh"

"pahlī sī dil ko ḳhvāhish-e-hijrat nahīñ rahī kyā ai zamīñ hamārī zarūrat nahīñ rahī āñgan meñ saarī raat barastī rahī ghaTā dīvār ghar kī koī salāmat nahīñ rahī yuñhī nahīñ irāda-e-pahlū-tahī ki ab un se nibāh karne kī sūrat nahīñ rahī patte haiñ ḳhushk phir bhī shajar se haiñ munsalik kyā kījiye havā kī ināyat nahīñ rahī dariyā meñ laakh maujeñ rahīñ sar-ba-kaf magar kachche gharoñ ko ab koī vahshat nahīñ rahī galiyoñ meñ phir se farsh-e-lahū bichh gayā tamām insāñ meñ āj-kal ke sharāfat nahīñ rahī"

"dil se mahrūmī-e-ehsās miTāne ke liye gul khile haiñ mire zaḳhmoñ ko dukhāne ke liye phir se āvāz ke dariyā meñ mire naam kī naav bādbānoñ ko uThātī hai girāne ke liye raat Dhaltī hai chalo DhūñD ke jugnū laa.eñ vāda-e-anjum-o-mahtāb nibhāne ke liye kuchh parinde mire āñgan meñ utar aa.e haiñ bāl-o-par tez havāoñ se bachāne ke liye sar se sūraj tirī chāhat kā Dhalā hai shāyad mujh pe har sāya-e-dīvār girāne ke liye apne jazboñ ko koī shakl na denā 'ābid' varna sūrat ko bhī tarsoge dikhāne ke liye"

"nazar meñ ek bhī chehra nahīñ charāġhoñ kā ġhubār hai mirī āñkhoñ meñ kin ujāloñ kā chaTān hai tirā paikar to aañkh nam kyoñ hai javāb DhūñDhtā rahtā huuñ in savāloñ kā fazā meñ āñdhiyāñ is zor se chalī haiñ ki ab parind bhuul ga.e rāsta uḌānoñ kā hai aaj bhī mire pahlū meñ ik ajiib ḳhalish ye iktisāb-e-karam hai tumhārī bāñhoñ kā"

"ye dāġh-e-hijr nahīñ miT sakā jabīñ kā lagā zamīñ kahīñ kī hai paivand hai kahīñ kā lagā milā hai dasht hameñ justujū meñ manzil kī gumāñ thā paañv meñ aur aabla yaqīñ kā lagā hamārā nām-o-nasab ham se pūchhne vaale lahū na is tarah dāman pe āstīñ kā lagā uThā ke dosh pe ḳheme nikal paḌe ham log zarā na ḳhauf hameñ ajnabī zamīñ kā lagā"

"shikve hameñ to jehd-e-mukarrar ke nahīñ haiñ hijrat huī hai yuuñ ki kisī ghar ke nahīñ haiñ kis jurm meñ ye pahlū-tahī ham se ravā hai ai shīsha-garo ham koī patthar ke nahīñ haiñ sar-basta-e-zanjīr kiyā ham ko jinhoñ ne vo log usī ghar ke haiñ bāhar ke nahīñ haiñ kis darja mukarram haiñ mire ashk na pūchho vo daam mile haiñ ki jo gauhar ke nahīñ haiñ vo dard sahā hai ki jo ġhairoñ kā nahīñ thā vo zaḳhm lage haiñ ki jo ḳhanjar ke nahīñ haiñ"