"ham tire husn-e-jahāñ-tāb se Dar jaate haiñ aise muflis haiñ ki asbāb se Dar jaate haiñ ḳhauf aisā hai ki duniyā ke satā.e hue log kabhī mimbar kabhī mehrāb se Dar jaate haiñ raat ke pichhle pahar niiñd meñ chalte hue log ḳhuun hote hue mahtāb se Dar jaate haiñ shaad rahte haiñ isī jāma-e-uryānī meñ haañ magar atlas-o-kamḳhvāb se Dar jaate haiñ kabhī karte haiñ mubāraz-e-talabī duniyā se aur kabhī ḳhvāhish-e-betāb se Dar jaate haiñ jī to kahtā hai ki chaliye usī kūche kī taraf ham tirī bazm ke ādāb se Dar jaate haiñ ham to vo haiñ ki jinheñ raas nahīñ koī nagar kabhī sāhil kabhī girdāb se Dar jaate haiñ"
"ta.abīr ko tarse hue ḳhvāboñ kī zabāñ haiñ tasvīr ke hoñToñ pe jo bosoñ ke nishāñ haiñ āñkhoñ meñ tar-o-tāza haiñ jis ahd ke manzar ham log usī ahd-e-guzishta meñ javāñ haiñ nīlām hamārā bhī isī shart pe hogā ham raunaq-e-bāzār haiñ jaise haiñ jahāñ haiñ dil thā ki kisī sā.at-e-pur-ḳhūñ meñ huā sard āñkheñ haiñ ki ab tak tirī jānib nigarāñ haiñ dīvār pe likkhā hai ki ab sub.h na hogī aur sāya-e-dīvār meñ ham raqs-kunāñ haiñ"
Shayari Of Abbas Rizvi"jab koī tiir havādis kī kamāñ se aayā naġhma ik aur mire mutrib-e-jāñ se aayā ek nazzāre ne mere liye āñkheñ bhejīñ dil kisī kārgah-e-shīsha-girāñ se aayā jab bhī is dil ne tire qurb kī daulat chāhī ek saaya sā nikal kar rag-e-jāñ se aayā maiñ na Dartā thā anāsir kī sitam-koshī se ḳhauf aayā to bas ik umr-e-ravāñ se aayā kyā karūñ ḳhil.at o dastār kī ḳhvāhish ki mujhe ziist karne kā salīqa bhī ziyāñ se aayā maiñ to ik ḳhvāb ko āñkhoñ meñ liye phirtā thā ye sitāra mire pahlū meñ kahāñ se aayā"
Shayari Of Abbas Rizvi"jis ko ham samajhte the umr bhar kā rishta hai ab vo rābta jaise rahguzar kā rishta hai sub.h tak ye maujeñ bhī thak ke so hī jā.eñgī chāñd kā samundar hai raat bhar kā rishta hai ye jo itne saare dil saath hī dhaḌakte haiñ kuchh qalam kā naata hai kuchh hunar kā rishta hai tez haiñ to kyā ġham hai tund haiñ to shikva kyā in havāoñ se apnā bāl-o-par kā rishta hai is hasīñ tasavvur kā merī surḳh āñkhoñ se aab o gil kā naata hai bām-o-dar kā rishta hai ek nā-tavāñ rishta us se ab bhī baaqī hai jis tarah duāoñ kā aur asar kā rishta hai"
Shayari Of Abbas Rizvi"dhuāñ sā phail gayā dil meñ shaam Dhalte hī badal ga.e mire mausam tire badalte hī simaTte phailte saa.e kalām karne lage lahū meñ ḳhauf kā pahlā charāġh jalte hī koī malūl sī ḳhushbū fazā meñ tair ga.ī kisī ḳhayāl ke harf-o-sadā meñ Dhalte hī vo dost thā ki adū maiñ ne sirf ye jaanā ki vo zamīn pe aayā mire sambhalte hī badan kī aag ne lafzoñ ko phir se zinda kiyā hurūf sabz hue barf ke pighalte hī vo habs thā ki tarastī thī saañs lene ko so ruuh taaza huī jism se nikalte hī"
Shayari Of Abbas Rizvi"ahl-e-junūñ the fasl-e-bahārāñ ke sar ga.e ham log ḳhvāhishoñ kī harārat se mar ga.e hijr o visāl ek hī lamhe kī baat thī vo pal guzar gayā to zamāne guzar ga.e ai tīrgī-e-shahr-e-tamannā batā bhī de vo chāñd kyā hue vo sitāre kidhar ga.e vahshat ke is nagar meñ vo qaus-e-quzah se log jaane kahāñ se aa.e the jaane kidhar ga.e ḳhushbū asiir kar ke uḌaa.e phirī hameñ phir yuuñ huā ki ham bhī fazā meñ bikhar ga.e"
Shayari Of Abbas Rizvi"har taraf shor-e-fuġhāñ hai koī suntā hī nahīñ qāfila hai ki ravāñ hai koī suntā hī nahīñ ik sadā pūchhtī rahtī hai koī zinda hai maiñ kahe jaatā huuñ haañ hai koī suntā hī nahīñ maiñ jo chup thā hama-tan-gosh thī bastī saarī ab mire muñh meñ zabāñ hai koī suntā hī nahīñ dekhne vaale to is shahr meñ yuuñ bhī kam the ab samā.at bhī girāñ hai koī suntā hī nahīñ ek hañgāma ki is dil meñ bapā rahtā thā ab karāñ-tā-ba-karāñ hai koī suntā hī nahīñ kyā sitam hai ki mire shahr meñ merī āvāz jaise āvāz-e-sagāñ hai koī suntā hī nahīñ"
Shayari Of Abbas Rizvi