naam ḳhushbū thā sarāpā bhī ġhazal jaisā thā — Shayari Of Abbas Dana

"bevafā.ī us ne kī merī vafā apnī jagah ḳhūn-e-dil apnī jagah rañg-e-hinā apnī jagah kitne chehre aa.e apnā nuur kho kar chal diye hai magar raushan abhī tak aa.ina apnī jagah zindagī ne us ko sāhil se sadā.eñ diiñ bahut vaqt kā dariyā magar bahtā rahā apnī jagah us kī mahfil se mujhe ab koī nisbat hī nahīñ hai mirī tanhā.iyoñ kā silsila apnī jagah ham charāġhoñ se kareñge dostī kī baat ab ye añdheroñ ne kiyā hai faisla apnī jagah to samundar aur merī zaat ik qatra sahī terī rahmat har taraf merī duā apnī jagah ab to mujh ko bhī sadā dete haiñ 'dānā' kah ke log zindagī rahne de apnā mashvara apnī jagah"

"aql-o-dānish ko zamāne se chhupā rakkhā hai ḳhud ko dānista hī dīvāna banā rakhā hai ghar kī vīrāniyāñ le jaa.e churā kar koī isī ummīd pe darvāza khulā rakkhā hai ban ga.e ūñche mahal un kī ibādat gāheñ naam daulat kā jahāñ sab ne ḳhudā rakkhā hai qābil-e-rashk se vo duḳhtar-e-muflis jis ne tañg-dastī meñ bhī izzat ko bachā rakkhā hai jis ke mahloñ meñ charāġhoñ kā na thā koī shumār us kī turbat pe faqat ek diyā rakkhā hai is se baḌh kar tirī yādoñ kī karūñ kyā tāzīm terī yādoñ meñ zamāne ko bhulā rakkhā hai surḳh-rū ho ga.iiñ tanhā.iyāñ merī 'dānā' us ne kāñdhe pe mire dast-e-hinā rakkhā hai"

"us kī vafā na merī vafā kā savāl thā donoñ hī chup the sirf anā kā savāl thā is kashmakash meñ ḳhatm huā raat kā safar zid thī mirī to us kī hayā kā savāl thā sab muntazir the āsmāñ detā hai kyā javāb pyāse laboñ pe kaalī ghaTā kā savāl thā majbūr ham the aur vo muḳhtār thā magar donoñ ke beach dast duā kā savāl thā jaanā thā mai-kade se hameñ kū-e-yār tak lekin hamārī laġhzish-e-pā kā savāl thā taqsīm karne niklā thā vo raushnī magar jalte hue diye ko havā kā savāl thā 'dānā' mujhe azal se ġhazal kī talāsh thī ye merī zindagī kī adā kā savāl thā"

"maut ne muskurā ke pūchhā hai zindagī kā mizāj kaisā hai us kī āñkhoñ meñ merī ġhazleñ haiñ merī ġhazloñ meñ us kā chehrā hai us se pūchho azaab rastoñ kā jis kā sāthī safar meñ bichhḌā hai chāñdnī sirf hai fareb-e-nazar chāñd ke ghar meñ bhī añdherā hai ishq meñ bhī maza hai jiine kā ġham uThāne kā gar salīqa hai chhoḌ zaḳhmoñ pe tabsira karnā ab qalam se lahū Tapaktā hai raushnī kī zabān meñ 'dānā' vo charāġhoñ se baat kartā hai"

"koī subūt-e-jurm jagah par nahīñ milā TuuTe paḌe the aa.ine patthar nahīñ milā patthar ke jaisī be-hisī us kā nasīb hai vo qaum jis ko koī payambar nahīñ milā jab tak vo jhuuT kahtā rahā sar pe taaj thā sach kah diyā to taaj hī kyā sar nahīñ milā ham rāt-bhar jaleñ bhī tumheñ raushnī bhī deñ ham ko charāġh jaisā muqaddar nahīñ milā shahr-e-sitam bhī jashn-e-amāñ mat manā abhī shāyad sitamgaroñ ko tirā ghar nahīñ milā maañ baap kī duāoñ se baḌh kar jahez meñ dulhan ko aur koī bhī zevar nahīñ milā 'dānā' vo ab bhī aatā hai tanhā.iyoñ meñ yaad duniyā kī bhiiḌ meñ jo bichhaḌ kar nahīñ milā"

"zarf se baḌh ke ho itnā nahīñ māñgā jaatā pyaas lagtī hai to dariyā nahīñ māñgā jaatā chāñd jaisī bhī ho beTī kisī muflisī kī to ūñche ghar vāloñ se rishta nahīñ māñgā jaatā dostī kar ke havā se jo jalā deñ ghar ko un charāġhoñ se ujālā nahīñ māñgā jaatā apne kamzor buzurgoñ kā sahārā mat lo sūkhe peḌoñ se to saaya nahīñ māñgā jaatā peT bharte haiñ jo māñge hue TukḌe khā kar un ke hāthoñ se nivāla nahīñ māñgā jaatā bhiik bhī māñgo to tahzīb kā kaasa le kar haath phailā ke ḳhazāna nahīñ māñgā jaatā hai ibādat ke liye shart aqīdat 'dānā' bandagī ke liye sajda nahīñ māñgā jaatā"