Shayari Of Abbas Dana

"mirā ḳhulūs abhī saḳht imtihān meñ hai ki mere dost kā dushman mirī amaan meñ hai vo ḳhush-nasīb parinda hai jo uḌaan meñ hai ki tiir niklā nahīñ hai abhī kamān meñ hai tumhārā naam liyā thā kabhī mohabbat se miThās us kī abhī tak mirī zabān meñ hai tum aake lauT ga.e phir bhī ho yahīñ maujūd tumhāre jism kī ḳhushbū mire makān meñ hai kahāñ milegā hasīnoñ ko daur-e-hāzir meñ vo shāhzāda jo pariyoñ kī dāstān meñ hai hai jism saḳht magar dil bahut hī nāzuk hai ki jaise aa.ina mahfūz ik chaTān meñ hai tujhe jo zaḳhm de tū us ko phuul de 'dānā' yahī usūl-e-vafā tere ḳhāndān meñ hai"

"apne hī ḳhuun se is tarah adāvat mat kar zinda rahnā hai to sāñsoñ se baġhāvat mat kar siikh le pahle ujāloñ kī hifāzat karnā sham.a bujh jaa.e to āñdhī se shikāyat mat kar sar kī bāzār-e-siyāsat meñ nahīñ hai qīmat sar pe jab taaj nahīñ hai to hukūmat mat kar ḳhvāb ho jaam ho taara ho ki mahbūb kā dil TūTne vaalī kisī shai se mohabbat mat kar dekh phir dast-e-zarūrat meñ na bik jaa.e zamīr zar ke badle meñ usūloñ kī tijārat mat kar pursish-e-hāl se ho jā.eñge phir zaḳhm hare is se behtar hai yahī merī ayādat mat kar sar jhukāne ko hī sajda nahīñ kahte 'dānā' jis meñ dil bhī na jhuke aisī ibādat mat kar"

"naam ḳhushbū thā sarāpā bhī ġhazal jaisā thā chāñd se chehre pe parda bhī ġhazal jaisā thā saare alfāz ġhazal jaise the guftār ke vaqt rañg-e-iz.hār-e-tamannā bhī ġhazal jaisā thā phuul hī phuul the kaliyāñ thiiñ hasīñ galiyāñ thiiñ aap ke ghar kā vo rasta bhī ġhazal jaisā thā us kī āñkheñ bhī hasīñ aañkh meñ aañsū bhī hasīñ ġham meñ Duubā huā chehra bhī ġhazal jaisā thā vo javānī vo mohabbat vo sharārat kā nasha vo mirī umr kā hissa bhī ġhazal jaisā thā fāsle the na judā.ī thī na tanhā.ī thī terī qurbat kā vo lamha bhī ġhazal jaisā thā vo na merā na maiñ us kā thā magar ai 'dānā' dhuñdlā dhuñdlā sā vo rishta bhī ġhazal jaisā thā"

"maut ne muskurā ke pūchhā hai zindagī kā mizāj kaisā hai us kī āñkhoñ meñ merī ġhazleñ haiñ merī ġhazloñ meñ us kā chehrā hai us se pūchho azaab rastoñ kā jis kā sāthī safar meñ bichhḌā hai chāñdnī sirf hai fareb-e-nazar chāñd ke ghar meñ bhī añdherā hai ishq meñ bhī maza hai jiine kā ġham uThāne kā gar salīqa hai chhoḌ zaḳhmoñ pe tabsira karnā ab qalam se lahū Tapaktā hai raushnī kī zabān meñ 'dānā' vo charāġhoñ se baat kartā hai"

"gardish-e-daurāñ se ik lamha churāne liye sochnā paḌtā hai kitnā muskurāne ke liye kitnī zahmat jheltā hai ek muflis mezbān ghar kī bad-halī ko mehmāñ se chhupāne ke liye bhuuk un ko le ga.ī hai kār-ḳhānoñ kī taraf ghar se bachche nikle the schōl jaane ke liye ḳhuun apnā bech kar aayā hai ik majbūr baap beTiyoñ ke haath par mehñdī lagāne ke liye zindagī jaltī hai kitnī dozaḳhoñ kī aag meñ chār-dīvāroñ kī ik jannat banāne ke liye haa.e tyauhāroñ ne logoñ ko bhikārī kar diyā qarz lenā paḌtā hai ḳhushiyāñ manāne ke liye ho rahe haiñ aaj daana āñdhiyoñ meñ mashvare sirf mere ghar kā ik dīpak bujhāne ke liye"

"dil lagāyā hai to nafrat bhī nahīñ kar sakte ab tire shahr se hijrat bhī nahīñ kar sakte āḳhrī vaqt meñ jiine kā sahārā hai yahī terī yādoñ se baġhāvat bhī nahīñ kar sakte jhuuT bole to jahāñ ne hameñ fankārī kahā ab to sach kahne kī himmat bhī nahīñ kar sakte is na.e daur ne māñ-bāp kā haq chhīn liyā apne bachchoñ ko nasīhat bhī nahīñ kar sakte ham ujāloñ ke payambar to nahīñ haiñ lekin kyā charāġhoñ kī hifāzat bhī nahīñ kar sakte qadr insān kī ghaT ghaT ke yahāñ tak pahuñchī ab to qīmat meñ ri.āyat bhī nahīñ kar sakte fan kī tāzīm meñ mar jāoge bhūke 'dānā' tum to ġhazloñ kī tijārat bhī nahīñ kar sakte"

"vafādārī pe de dī jaan ġhaddārī nahīñ aa.ī hamāre ḳhuun meñ ab tak ye bīmārī nahīñ aa.ī ḳhudā kā shukr sohbat kā asar hotā nahīñ ham par adākāroñ meñ rah kar bhī adākārī nahīñ aa.ī amīr-e-shahr ho kar bhī nahīñ koī tirī izzat tire hisse meñ ġhairat aur ḳhuddārī nahīñ aa.ī hamārī dars-gāhoñ kī nizāmat aisī bigḌī hai kitābeñ paḌh ke bhī bachchoñ meñ hushyārī nahīñ aa.ī lagā.ī aag us ne shahr meñ itnī safā.ī se ki us ke ghar pe uḌ ke ik bhī chingārī nahīñ aa.ī abhī se kis liye beTe ko bhejeñ naukrī karne hamāre dast-o-pā meñ itnī lāchārī nahīñ aa.ī maiñ nādānī pe apnī aaj tak hairān huuñ 'dānā' ki duniyā ko samajhne kī samajhdārī nahīñ aa.ī"

"aql-o-dānish ko zamāne se chhupā rakkhā hai ḳhud ko dānista hī dīvāna banā rakhā hai ghar kī vīrāniyāñ le jaa.e churā kar koī isī ummīd pe darvāza khulā rakkhā hai ban ga.e ūñche mahal un kī ibādat gāheñ naam daulat kā jahāñ sab ne ḳhudā rakkhā hai qābil-e-rashk se vo duḳhtar-e-muflis jis ne tañg-dastī meñ bhī izzat ko bachā rakkhā hai jis ke mahloñ meñ charāġhoñ kā na thā koī shumār us kī turbat pe faqat ek diyā rakkhā hai is se baḌh kar tirī yādoñ kī karūñ kyā tāzīm terī yādoñ meñ zamāne ko bhulā rakkhā hai surḳh-rū ho ga.iiñ tanhā.iyāñ merī 'dānā' us ne kāñdhe pe mire dast-e-hinā rakkhā hai"

"koī subūt-e-jurm jagah par nahīñ milā TuuTe paḌe the aa.ine patthar nahīñ milā patthar ke jaisī be-hisī us kā nasīb hai vo qaum jis ko koī payambar nahīñ milā jab tak vo jhuuT kahtā rahā sar pe taaj thā sach kah diyā to taaj hī kyā sar nahīñ milā ham rāt-bhar jaleñ bhī tumheñ raushnī bhī deñ ham ko charāġh jaisā muqaddar nahīñ milā shahr-e-sitam bhī jashn-e-amāñ mat manā abhī shāyad sitamgaroñ ko tirā ghar nahīñ milā maañ baap kī duāoñ se baḌh kar jahez meñ dulhan ko aur koī bhī zevar nahīñ milā 'dānā' vo ab bhī aatā hai tanhā.iyoñ meñ yaad duniyā kī bhiiḌ meñ jo bichhaḌ kar nahīñ milā"

"zarf se baḌh ke ho itnā nahīñ māñgā jaatā pyaas lagtī hai to dariyā nahīñ māñgā jaatā chāñd jaisī bhī ho beTī kisī muflisī kī to ūñche ghar vāloñ se rishta nahīñ māñgā jaatā dostī kar ke havā se jo jalā deñ ghar ko un charāġhoñ se ujālā nahīñ māñgā jaatā apne kamzor buzurgoñ kā sahārā mat lo sūkhe peḌoñ se to saaya nahīñ māñgā jaatā peT bharte haiñ jo māñge hue TukḌe khā kar un ke hāthoñ se nivāla nahīñ māñgā jaatā bhiik bhī māñgo to tahzīb kā kaasa le kar haath phailā ke ḳhazāna nahīñ māñgā jaatā hai ibādat ke liye shart aqīdat 'dānā' bandagī ke liye sajda nahīñ māñgā jaatā"

"us kī vafā na merī vafā kā savāl thā donoñ hī chup the sirf anā kā savāl thā is kashmakash meñ ḳhatm huā raat kā safar zid thī mirī to us kī hayā kā savāl thā sab muntazir the āsmāñ detā hai kyā javāb pyāse laboñ pe kaalī ghaTā kā savāl thā majbūr ham the aur vo muḳhtār thā magar donoñ ke beach dast duā kā savāl thā jaanā thā mai-kade se hameñ kū-e-yār tak lekin hamārī laġhzish-e-pā kā savāl thā taqsīm karne niklā thā vo raushnī magar jalte hue diye ko havā kā savāl thā 'dānā' mujhe azal se ġhazal kī talāsh thī ye merī zindagī kī adā kā savāl thā"

"jo haiñ mazlūm un ko to taḌaptā chhoḌ dete haiñ ye kaisā shahr hai zālim ko zinda chhoḌ dete haiñ anā ke sikke hote haiñ faqīroñ kī bhī jholī meñ jahāñ zillat mile us dar pe jaanā chhoḌ dete haiñ huā kaisā asar ma.asūm zehnoñ par ki bachchoñ ko agar paise dikhāo to khilaunā chhoḌ dete haiñ agar ma.alūm ho jaa.e paḌosī apnā bhūkā hai to ġhairat-mand hāthoñ se nivāla chhoḌ dete haiñ mohazzab log bhī samjhe nahīñ qānūn jangal kā shikārī sher bhī kavvoñ kā hissa chhoḌ dete haiñ parindoñ ko bhī insāñ kī tarah hai fikr rozī kī sahar hote hī apnā āshiyāna chhoḌ dete haiñ ta'ajjub kuchh nahīñ 'dānā' jo bāzār-e-siyāsat meñ qalam bik jaa.eñ to sach baat likhnā chhoḌ dete haiñ"