jis tarah bachche buzurgoñ ke charan chūmte haiñ — All Writings Of Aalam Nizami

"kabhī shafaq to kabhī gul kabhī jināñ mahke tumhāre naqsh-e-qadam bhī kahāñ kahāñ mahke koī amīn-e-sadāqat idhar se guzrā hai qadam qadam pe jo yuuñ rāh-e-imtihāñ mahke ye kis ke naam kī ḳhushbū hai mere she'roñ meñ nafas nafas hai mo'attar mashām-e-jāñ mahke chaman-badosh vo aa.e mire tasavvur meñ mire ḳhayāl-o-ma'ānī kā kul-jahāñ mahke ye kis ne raḳht-e-safar bāñdhne kī Thānī hai zamīn vajd meñ hai aur āsmāñ mahke jinhoñ ne rāh-e-sadāqat meñ apnī jāneñ diiñ paḌho jo dāstāñ un kī to dāstāñ mahke"

"ye alag baat ki zinda huuñ zamāne ke liye roz martā huuñ magar ḳhud ko bachāne ke liye maut aatī hai shab-o-roz mirī chaukhaT par zindagī kī mujhe tasvīr dikhāne ke liye girne vāloñ ko sahārā nahīñ detī duniyā aa hī jaatā hai magar koī uThāne ke liye kuchh ḳhatāoñ kī mu'āfī bhī nahīñ hotī hai us se keh do na kabhī aa.e manāne ke liye ab to ahbāb bhī zaḳhmoñ pe chhiḌakte haiñ namak dil ke zaḳhmoñ ko kahāñ jā.ūñ dikhāne ke liye ḳhud-numā.ī kā charāġhoñ pe nasha taarī hai muttahid ho ga.e sūraj ko bujhāne ke liye ab to lagtā hai banegā yahīñ madfan 'ālam' gaañv se aa.e the pardes kamāne ke liye"

"daf'atan ghaTā kī aaḌ se chāñdnī kashīd ho ga.ī zulf us ke chehre se haTī aur merī 'iid ho ga.ī roz roz milnā aap se hai ḳhatā magar maiñ kyā karūñ ye ḳhatā bahut hasīn thī is liye mazīd ho ga.ī jab se tum ne mujh faqīr par kī hai iltifāt kī nazar yuuñ huā ki shaḳhsiyat mirī ḳhud mirī murīd ho ga.ī 'mīr' ke taḳhayyulāt kā shahd jab se fikr meñ ghulā aur bhī shu'ūr aa gayā shā'irī jadīd ho ga.ī thī fazā vafā kī ḳhush-gavār apne daur-e-eqtidār meñ miT gayā vafāoñ kā nishāñ ab jafā shadīd ho ga.ī ai 'nizāmī' kā.enāt meñ karbalā se le ke aaj tak jab kahīñ husainiyat baḌhī to fazā yazīd ho ga.ī"

"jinheñ 'urūj hamārā girāñ guzartā hai sukūñ se un kā koī din kahāñ guzartā hai vo chhoḌ jaatā hai fitnoñ ke darmiyāñ ham ko hamāre shahr se jab bhī fulāñ guzartā hai masarratoñ ke ye mausam bhī is tarah guzre kisī makān se jaise dhuāñ guzartā hai agar sharīk-e-safar ho mizāj se vāqif to zindagī kā safar kāmrāñ guzartā hai bhaTakne vaale musāfir kī rahbarī ke liye ġhubār uḌātā huā kārvāñ guzartā hai jabīñ pe sajde kī hasrat machalne lagtī hai namāziyoñ pe jo vaqt-e-azāñ guzartā hai usī kī zaat pe kartā hai rashk ye 'ālam' jo chhoḌ kar koī dilkash nishāñ guzartā hai"

"kisī maqām se guzre nahīñ phisaltā hai jo haq-parastoñ ke naqsh-e-qadam pe chaltā hai sunā hai karne lagā hai vo raushnī taqsīm mire charāġh se jis kā charāġh jaltā hai fazā-e-zīst pe chhā.ī huī hai tārīkī bahut dinoñ se ye manzar nahīñ badaltā hai bisāt itnī kahāñ hai jo chheḌeñ sūraj ko in āñdhiyoñ kā diyoñ par hī zor chaltā hai tumhāre zulm pe chup huuñ ye zarf hai merā ubalne ko to mirā bhī lahū ubaltā hai hameñ na kījiye majbūr hijratoñ ke liye daraḳht apnā Thikāna nahīñ badaltā hai ḳhudā hī hāmī-o-nāsir hai us kā ai 'ālam' jo khā ke bārhā Thokar nahīñ sañbhaltā hai"

"ġhair-mumkin hai ki vo mujh se ḳhafā ho jā.egā aur agar aisā huā to mo'jiza ho jā.egā us kī yādoñ kī musalsal chheḌ se kuchh ho na ho dil ke zaḳhmoñ kā magar mausam harā ho jā.egā tū mirī Thokar meñ hai yā maiñ tirī Thokar meñ huuñ gardish-e-daurāñ kisī din faisla ho jā.egā kar rahā hai jo mirā nuqsān apnī zaat se hai use ye zo'm vo merā ḳhudā ho jā.egā hai misāl-e-qatra-e-shabnam añdhere kā ġhurūr ik zarā sī raushnī se ye fanā ho jā.egā aao mil kar ektā kī mash'aleñ raushan kareñ do hī din meñ nafratoñ kā ḳhātma ho jā.egā ḳhvāb āzādī ke dekhe the sukūñ ke vāste kyā ḳhabar thī mulk merā karbalā ho jā.egā"