All Writings Of Aalam Nizami

"dānista kabhī aisī himāqat nahīñ kartā fankār huuñ tauhīn-e-mohabbat nahīñ kartā kyā raas use aa.egī dastār-e-fazīlat jo apne usūloñ kī hifāzat nahīñ kartā is daur meñ ham us ko farishta hī kaheñge fāqoñ meñ jo ġhairat kī tijārat nahīñ kartā tūfān se laḌne kā agar shauq na hotā maiñ ‘azmat-e-sāhil se baġhāvat nahīñ kartā shāyad hai 'azīz us ko mirī muflisī 'ālam' vo mere muqaddar kī marammat nahīñ kartā"

"kabhī ilm ne use maat dī kabhī āgahī ne harā diyā jise tīrgī na harā sakī use raushnī ne harā diyā kabhī ḳhushk un ke na lab hue rahī jin kī qatroñ se dostī jo samundaroñ ke rafīq the unheñ tishnagī ne harā diyā jinheñ bebasī na harā sakī unheñ phir na koī harā sakā jo zarūratoñ ke ġhulām the unheñ har kisī ne harā diyā hameñ sar-bulandī atā huī jahāñ jis mahāz pe DaT ga.e mare roz jis kī talab meñ ham usī zindagī ne harā diyā na hai ilm-o-fan kī talab tumheñ na taraqqiyoñ kā junūn hai jo tumhārā tarz-e-hayāt hai tumheñ bas usī ne harā diyā rah-e-ishq meñ jo fanā hue unheñ jāvedānī atā huī jo asīr-e-husn-e-hayāt the unheñ be-hisī ne harā diyā"

"kabhī shafaq to kabhī gul kabhī jināñ mahke tumhāre naqsh-e-qadam bhī kahāñ kahāñ mahke koī amīn-e-sadāqat idhar se guzrā hai qadam qadam pe jo yuuñ rāh-e-imtihāñ mahke ye kis ke naam kī ḳhushbū hai mere she'roñ meñ nafas nafas hai mo'attar mashām-e-jāñ mahke chaman-badosh vo aa.e mire tasavvur meñ mire ḳhayāl-o-ma'ānī kā kul-jahāñ mahke ye kis ne raḳht-e-safar bāñdhne kī Thānī hai zamīn vajd meñ hai aur āsmāñ mahke jinhoñ ne rāh-e-sadāqat meñ apnī jāneñ diiñ paḌho jo dāstāñ un kī to dāstāñ mahke"

"jis tarah bachche buzurgoñ ke charan chūmte haiñ ham mohabbat se mohabbat kā badan chūmte haiñ muñh lagāte nahīñ bāzār ke phūloñ ko kabhī ham faqat apne gulāboñ ke dahan chūmte haiñ maiñ ne hālāt pe rakkhī hai ġhazal kī buniyād is liye log mirā rang-e-suḳhan chūmte haiñ muñh pe mal lete haiñ ham ḳhāk-e-madīna kī tarah maañ ke qadmoñ kī tarah ḳhāk-e-vatan chūmte haiñ zindagī meñ to unheñ bojh samajhte haiñ magar log marne pe buzurgoñ kā kafan chūmte haiñ aur baḌh jaatā hai manzil pe pahuñchne kā surūr aable jab mire pairoñ kī thakan chūmte haiñ"

"maiñ samajh rahā thā ki vaqt ne tirā naam dil se miTā diyā shab-e-ġham magar tirī yaad ne mujhe aaj phir se rulā diyā na hai tīrgī se gila koī na hai raushnī kī talab mujhe mirī hasratoñ ke charāġh ko tirī be-ruḳhī ne bujhā diyā ye mire hī zarf kī baat thī na kisī se kuchh bhī kahā magar tirī furqatoñ kā jo dard thā mire āñsuoñ ne batā diyā mire ham-nashīñ mire ham-navā tujhe nazr kyā karūñ maiñ batā mirā dil bhī merā nahīñ rahā tire 'ishq meñ hī luTā diyā na masarratoñ se sukūn kī kabhī chand sāñseñ 'atā huiiñ ġham-e-zindagī tirā shukriya mujhe tū ne jiinā sikhā diyā kahūñ us ko achchhā yā maiñ burā nahīñ hotā mujh se ye faisla kabhī dostī ne vafā kiyā kabhī dostī ne daġhā diyā"

"daf'atan ghaTā kī aaḌ se chāñdnī kashīd ho ga.ī zulf us ke chehre se haTī aur merī 'iid ho ga.ī roz roz milnā aap se hai ḳhatā magar maiñ kyā karūñ ye ḳhatā bahut hasīn thī is liye mazīd ho ga.ī jab se tum ne mujh faqīr par kī hai iltifāt kī nazar yuuñ huā ki shaḳhsiyat mirī ḳhud mirī murīd ho ga.ī 'mīr' ke taḳhayyulāt kā shahd jab se fikr meñ ghulā aur bhī shu'ūr aa gayā shā'irī jadīd ho ga.ī thī fazā vafā kī ḳhush-gavār apne daur-e-eqtidār meñ miT gayā vafāoñ kā nishāñ ab jafā shadīd ho ga.ī ai 'nizāmī' kā.enāt meñ karbalā se le ke aaj tak jab kahīñ husainiyat baḌhī to fazā yazīd ho ga.ī"

"merī palkoñ kī dahlīz par is tarah mere ashkoñ na tum jagmagāte raho kaifiyat dil kī zāhir kisī par na ho ġham ḳhushī kī jhalak meñ chhupāte raho Dagmagāne na do hausloñ ke qadam apnī himmat kā rakhnā hai tum ko bharam bijliyāñ āshiyāna jalātī raheñ tum nayā āshiyāna banāte raho kar deñ vīrāñ na ye amn kī bastiyāñ buġhz-o-nafrat kī ye sar-phirī āñdhiyāñ in ko rakhnā hai tum ko jo auqāt meñ tum charāġh-e-mohabbat jalāte raho kyā ḳhabar kyā haiñ aisī bhī majbūriyāñ baḌh ga.iiñ ḳhūnī rishtoñ meñ bhī dūriyāñ dosto ye taqāzā hai hālāt kā dūriyāñ tum diloñ kī miTāte raho sar kaTe yā rahe is kā ġham na karo zulm ke sāmne tum kahīñ na jhuko jo ġhalat hai tum us kī mazammat karo aur āvāz-e-haq bhī uThāte raho jī lo ḳhud ke liye kuchh nahīñ fā.eda zindagī kā hai 'ālam' yahī qā'eda maqsad-e-zindagī hogā hāsil tumheñ dūsroñ ke sadā kaam aate raho"

"kisī maqām se guzre nahīñ phisaltā hai jo haq-parastoñ ke naqsh-e-qadam pe chaltā hai sunā hai karne lagā hai vo raushnī taqsīm mire charāġh se jis kā charāġh jaltā hai fazā-e-zīst pe chhā.ī huī hai tārīkī bahut dinoñ se ye manzar nahīñ badaltā hai bisāt itnī kahāñ hai jo chheḌeñ sūraj ko in āñdhiyoñ kā diyoñ par hī zor chaltā hai tumhāre zulm pe chup huuñ ye zarf hai merā ubalne ko to mirā bhī lahū ubaltā hai hameñ na kījiye majbūr hijratoñ ke liye daraḳht apnā Thikāna nahīñ badaltā hai ḳhudā hī hāmī-o-nāsir hai us kā ai 'ālam' jo khā ke bārhā Thokar nahīñ sañbhaltā hai"

"kyā batā.ūñ kisī ko hai kyā dostī hai ġham-e-zindagī kī davā dostī nā-tavāñ ḳhud ko mahsūs jab bhī kiyā tū ne baḳhshā mujhe hausla dostī dekh kar jis ko lagtī hai duniyā hasīñ hai mohabbat kā vo aa.ina dostī raushnī kā safar yā añdhere kā ho har safar meñ rahī ham-navā dostī lākhoñ ehsāñ haiñ tere mirī zaat par haq tirā kis tarah ho adā dostī jis se 'ālam' mahaktā hai merā vajūd ḳhushbūoñ kī hai aisī fazā dostī"

"jinheñ 'urūj hamārā girāñ guzartā hai sukūñ se un kā koī din kahāñ guzartā hai vo chhoḌ jaatā hai fitnoñ ke darmiyāñ ham ko hamāre shahr se jab bhī fulāñ guzartā hai masarratoñ ke ye mausam bhī is tarah guzre kisī makān se jaise dhuāñ guzartā hai agar sharīk-e-safar ho mizāj se vāqif to zindagī kā safar kāmrāñ guzartā hai bhaTakne vaale musāfir kī rahbarī ke liye ġhubār uḌātā huā kārvāñ guzartā hai jabīñ pe sajde kī hasrat machalne lagtī hai namāziyoñ pe jo vaqt-e-azāñ guzartā hai usī kī zaat pe kartā hai rashk ye 'ālam' jo chhoḌ kar koī dilkash nishāñ guzartā hai"

"naqsh-e-hastī miTā bhī detā hai hādisa hausla bhī detā hai sab vafādār to nahīñ hote yaar koī daġhā bhī detā hai vaqt kartā hai chashm-poshī bhī haath meñ aa.ina bhī detā hai aañkh meñ chubhtā hai ġhubār magar qāfile kā pata bhī detā hai aaj ke daur meñ huā sābit khoTā sikka sadā bhī detā hai"

"'ishq meñ jānñā zarūrī hai kyā nahīñ aur kyā zarūrī hai kaam lījiye dimāġh se lekin dil se bhī mashvara zarūrī hai dār-e-zulmat meñ raushnī ke liye nusḳha-e-kīmiyā zarūrī hai chheḌ kar chhoḌ ne meñ ḳhatra hai saañp ko mārnā zarūrī hai rishta rakhiye masarratoñ se magar ġham se bhī rābta zarūrī hai ḳhāmushī achchhī chiiz hai lekin vaqt par bolnā zarūrī hai jo bhī patthar-sifat haiñ un se zarā ā.īno fāsla zarūrī hai aarzū hai agar gulāboñ kī shāḳh-e-gul se vafā zarūrī hai"