sāmne tez havāoñ ke jo uḌ jā.egā — All Writings Of Aalam Nizami

"kisī maqām se guzre nahīñ phisaltā hai jo haq-parastoñ ke naqsh-e-qadam pe chaltā hai sunā hai karne lagā hai vo raushnī taqsīm mire charāġh se jis kā charāġh jaltā hai fazā-e-zīst pe chhā.ī huī hai tārīkī bahut dinoñ se ye manzar nahīñ badaltā hai bisāt itnī kahāñ hai jo chheḌeñ sūraj ko in āñdhiyoñ kā diyoñ par hī zor chaltā hai tumhāre zulm pe chup huuñ ye zarf hai merā ubalne ko to mirā bhī lahū ubaltā hai hameñ na kījiye majbūr hijratoñ ke liye daraḳht apnā Thikāna nahīñ badaltā hai ḳhudā hī hāmī-o-nāsir hai us kā ai 'ālam' jo khā ke bārhā Thokar nahīñ sañbhaltā hai"

"dhuup meñ qatra-e-shabnam ko taras jāoge shahr meñ gaañv ke mausam ko taras jāoge zaḳhm itne tumheñ āvāra-mizājī degī gardish-e-vaqt ke marham ko taras jāoge din meñ jugnū kī tabāhī pe manā lo ḳhushiyāñ shab meñ chamkegā to mātam ko taras jāoge zindagī se kabhī ārām talab mat karnā dosto mehnat-e-paiham ko taras jāoge ādamiyyat ke libāde meñ raho tum varna ek din nisbat-e-ādam ko taras jāoge aaj āsānī se miltā huuñ to mil lo varna dekhne ke liye 'ālam' ko taras jāoge"

"daf'atan ghaTā kī aaḌ se chāñdnī kashīd ho ga.ī zulf us ke chehre se haTī aur merī 'iid ho ga.ī roz roz milnā aap se hai ḳhatā magar maiñ kyā karūñ ye ḳhatā bahut hasīn thī is liye mazīd ho ga.ī jab se tum ne mujh faqīr par kī hai iltifāt kī nazar yuuñ huā ki shaḳhsiyat mirī ḳhud mirī murīd ho ga.ī 'mīr' ke taḳhayyulāt kā shahd jab se fikr meñ ghulā aur bhī shu'ūr aa gayā shā'irī jadīd ho ga.ī thī fazā vafā kī ḳhush-gavār apne daur-e-eqtidār meñ miT gayā vafāoñ kā nishāñ ab jafā shadīd ho ga.ī ai 'nizāmī' kā.enāt meñ karbalā se le ke aaj tak jab kahīñ husainiyat baḌhī to fazā yazīd ho ga.ī"

"jinheñ 'urūj hamārā girāñ guzartā hai sukūñ se un kā koī din kahāñ guzartā hai vo chhoḌ jaatā hai fitnoñ ke darmiyāñ ham ko hamāre shahr se jab bhī fulāñ guzartā hai masarratoñ ke ye mausam bhī is tarah guzre kisī makān se jaise dhuāñ guzartā hai agar sharīk-e-safar ho mizāj se vāqif to zindagī kā safar kāmrāñ guzartā hai bhaTakne vaale musāfir kī rahbarī ke liye ġhubār uḌātā huā kārvāñ guzartā hai jabīñ pe sajde kī hasrat machalne lagtī hai namāziyoñ pe jo vaqt-e-azāñ guzartā hai usī kī zaat pe kartā hai rashk ye 'ālam' jo chhoḌ kar koī dilkash nishāñ guzartā hai"

"ye alag baat ki zinda huuñ zamāne ke liye roz martā huuñ magar ḳhud ko bachāne ke liye maut aatī hai shab-o-roz mirī chaukhaT par zindagī kī mujhe tasvīr dikhāne ke liye girne vāloñ ko sahārā nahīñ detī duniyā aa hī jaatā hai magar koī uThāne ke liye kuchh ḳhatāoñ kī mu'āfī bhī nahīñ hotī hai us se keh do na kabhī aa.e manāne ke liye ab to ahbāb bhī zaḳhmoñ pe chhiḌakte haiñ namak dil ke zaḳhmoñ ko kahāñ jā.ūñ dikhāne ke liye ḳhud-numā.ī kā charāġhoñ pe nasha taarī hai muttahid ho ga.e sūraj ko bujhāne ke liye ab to lagtā hai banegā yahīñ madfan 'ālam' gaañv se aa.e the pardes kamāne ke liye"

"zamāne par 'ayāñ merā hunar hone nahīñ detā na jaane kyoñ mujhe vo mo'tabar hone nahīñ detā vo zālim apnī yādoñ se sadā ābād rakhtā hai mire TuuTe hue dil ko khañDar hone nahīñ detā ḳhudā ke fazl se paa.ī hai vo ehsās kī daulat kisī bhī baat ko maiñ darguzar hone nahīñ detā hamesha is adā se vo mirī imdād kartā hai zarā bhī merī ġhairat ko ḳhabar hone nahīñ detā koī mausam koī rut ho tasavvur us ke chehre kā kisī jalve ko mahbūb-e-nazar hone nahīñ detā tū mujh se us kī yādoñ kā asāsa chhīn le yārab ye merī ḳhvāhishoñ ko muḳhtasar hone nahīñ detā"