Shayari Of Achyutam Yadav

"rah rah ke mujhe itnā satātī hai udāsī aañsū mirī āñkhoñ se churātī hai udāsī tum sochte to hoge ki kis ke liye āḳhir qālīn in ashkoñ kī bichhātī hai udāsī jab dhuup masarrat kī mujhe lagtī hai chhūne saa.e meñ mujhe apne chhupātī hai udāsī har vaqt mujhe rā.egāñ sābit kiyā us ne aur dekho to sar bhī na jhukātī hai udāsī har moḌ pe lagtā hai qazā paas hai apne ik aisā 'ajūba bhī dikhātī hai udāsī kahtā huuñ udāsī koī mahtāb nahīñ hai sūraj kī tarah sab ko jalātī hai udāsī taqdīr varaq māñgtī hai aur phir us pe ḳhushiyoñ se kahīñ pahle banātī hai udāsī"

"kabhī maiñ chalūñ kabhī tū chale kabhī be-maza ye safar na ho kise manziloñ kī talāsh hai hameñ chalte rahne kā Dar na ho kahāñ shab hai aur kahāñ sahar kahāñ dhuup aur kahāñ chāñdnī maiñ tire gumān meñ hī rahūñ mujhe in sabhī kī ḳhabar na ho ye jo āñsuoñ kā lifāfa hai ka.ī dard is meñ pale baḌhe kabhī jhāñk le mirī aañkh meñ tujhe e'tibār agar na ho na 'ayāñ huiiñ mirī ḳhāmiyāñ na 'ayāñ huiiñ tirī ḳhāmiyāñ koī karnā chāhe bhī gar 'ayāñ to sadā meñ us kī asar na ho"

"be-nafas aur be-sadā chehra aisā hī lagtā hai mirā chehra merā ik chehra dekhā hai tum ne par nahīñ dekhā dūsrā chehra us kī peshānī pe likhī thī bhuuk maañ ne beTe kā jab paḌhā chehra aisā chehra to mujh pe jachtā hai kyoñ hai be-kaif aap kā chehra ik diyā le ke aayā palkoñ par ḳhaak sā vo bujhā bujhā chehra in ġhamoñ ne to pheñkā thā tezāb ġhazloñ ne de diyā nayā chehra"

"yā to ruk jaao ki shāyad mirā yaar aa jaa.e ghoñp do varna ye ḳhanjar ki qarār aa jaa.e kyā ḳhabar tere tabassum kī kushāda rut meñ mere nāshād laboñ par bhī bahār aa jaa.e kyā ye taklīf hī hamrāh rahegī merī kaash pairoñ tale is ke koī ḳhaar aa jaa.e zeb-o-zīnat na kar itnī ki kahīñ le ke fuġhāñ kal ko dar par tire phūloñ kī qatār aa jaa.e is liye kī hai mohabbat kī zamīñ tar us ne ḳhushk hoñ jaise hī aañsū to darār aa jaa.e"

"javānī ziist kā hī ek hissa hai par is ne merā bachpan mujh se chhīnā hai bajā.e ḳhud-kushī ke dekh kar shīsha vo jī bhar ke agar ro le to achchhā hai pakaḌ kar ek uñglī in kināroñ kī nadī ne dhīre dhīre chalnā sīkhā hai utarte hī zamīñ pe raat ne dekhā thakā haarā sā din miTTī pe leTā hai ḳhud apne bachche ko hī god meñ le ke mujhe ik achchhā beTā banñā aayā hai mirī āñkheñ mujhe samjheñ na samjheñ par mire aañsū kā har qatra samajhtā hai zarā sī baat par dil dukhtā hai 'abtar' ye koī kah de to dil aur dukhtā hai"

"bah gayā us kā bhī lahū shāyad thak gayā hai mirā 'adū shāyad ruuTh kar aaj apne dilbar se lauT aayā vo apne kū shāyad chāhtā thā tujhe tabāh karūñ ho gayā dil-pazīr tū shāyad rab ne shab meñ falak ke kapḌoñ par tāroñ se kar diyā rafū shāyad mere dil ko mirī zehānat se karnī hai koī aarzū shāyad mujh ko ġhamgīn kartī jaatī hai aaj ḳhalvat kī justujū shāyad"

"un kī qismat sañvārtā huuñ maiñ ek do logoñ kā ḳhudā huuñ maiñ terī yādoñ ke par katar ke hī dil ke piñjre ko kholtā huuñ maiñ faisle dil se letā thā saare zehn ke shahr meñ nayā huuñ maiñ ḳhāmushī thā zabān vāloñ kī be-zabānoñ kī ab sadā huuñ maiñ kis ne āvāz dī hai pīchhe se kis kī ḳhātir rukā huā huuñ maiñ ġhāliban sochtā huuñ kaafī kam kuchh ziyāda hī sochtā huuñ maiñ ḳhud se aage nikal ke ai raahī ḳhud ko āvāz de rahā huuñ maiñ bārhā kartā huuñ hadeñ maiñ paar phir kahīñ paañv dekhtā huuñ maiñ jaane kitnoñ kī ho tumhīñ manzil jaane kitnoñ kā rāstā huuñ maiñ"

"dostī ho ga.ī hai ḳhalvat se chāhtā thā yahī maiñ muddat se hai kahāñ vaqt ik qulī ko jo bachchoñ ko dekh paa.e fursat se tang-dastī kī den hai ki vo shaḳhs gul churātā hai merī turbat se koī samjhā nahīñ shajar ke dukh chhāñv sab ne ḳharīdī daulat se mushkileñ ziina chaḌhtī haiñ jab bhī hausle kuud jaate haiñ chhat se tum bane ho mire liye 'abtar' ye sadā aa rahī hai jannat se"

muskurāne se ġham hue the 'ayāñ
aise ronā hai ab ki shaad lagūñ

kah rahā thā maiñ nahīñ hai dukh kisī bhī baat kā
aur chhalak ke gir gayā ik aañsū pichhlī raat kā