hai javānī ḳhud javānī kā siñgār — Shayari Of Ameer Minai

vasl ho jaa.e yahīñ hashr meñ kyā rakkhā hai
aaj kī baat ko kyuuñ kal pe uThā rakkhā hai

baaqī na dil meñ koī bhī yā rab havas rahe
chaudah baras ke sin meñ vo lākhoñ baras rahe

kartā maiñ dardmand tabīboñ se kyā rujūa
jis ne diyā thā dard baḌā vo hakīm thā

vo phuul sar chaḌhā jo chaman se nikal gayā
izzat use milī jo vatan se nikal gayā

taraf-e-ka.aba na jā haj ke liye nādāñ hai
ġhaur kar dekh ki hai ḳhāna-e-dil maskan-e-dost

vaa.e qismat vo bhī kahte haiñ burā
ham bure sab se hue jin ke liye