Watan

vatan ki fikr kar naadaan musibat aane vaali hai
tiri barbaadiyon ke mashvare hain aasmaanon mein

turkon kaa jis ne daaman hiron se bhar diyaa thaa
meraa vatan vahi hai meraa vatan vahi hai

mir-e-arab ko aai ThanDi havaa jahaan se
meraa vatan vahi hai meraa vatan vahi hai

mazhab nahin sikhaataa aapas mein bair rakhnaa
hindi hain ham vatan hai hindostaan hamaaraa

ham ahl-e-qafas tanhaa bhi nahin har roz nasim-e-subh-e-vatan
yaadon se moattar aati hai ashkon se munavvar jaati hai

ik khun-chakaan kafan mein karoDon banaao hain
paDti hai aankh tere shahidon pe huur ki

jannat ki zindagi hai jis ki fazaa mein jiinaa
meraa vatan vahi hai meraa vatan vahi hai

vo phuul sar chaDhaa jo chaman se nikal gayaa
izzat use mili jo vatan se nikal gayaa

jo safaayaa qaum kaa kar de vahi leader hai aaj
ho safaai haath mein jis ke vo hai ahl-e-hunar

khudaa bhi kaisaa huaa khush mire qarine par
mujhe shahid kaa darja milaa hai jiine par

vahi jiine ki aazaadi vahi marne ki jaldi hai
divaali dekh li ham ne dasahre kar liye ham ne

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

dayaar-e-ghair mein luTte to koi baat na thi
luTe vatan mein to sadma huaa na jaane kyuun

kaun mar kar dobaara zinda huaa
kaun mulk-e-fanaa se lauTaa hai

mulk ki galiyaan lahu piine ki aadi ho na jaaein
ye taassub zahr kaa zehnon mein bharnaa chhoD de

shahidon kaa tire shohra zamin se aasmaan tak hai
falak se balki aage baDh ke tere aastaan tak hai

aisaa hai ki sikkon ki tarah mulk-e-sukhan mein
jaari koi ik yaad puraani karein ham bhi

umr bhar sang-zani karte rahe ahl-e-vatan
ye alag baat ki dafnaaeinge eazaaz ke saath

rahzanon se mat Daro tum paarsaaon se bachcho
leadaraan-e-qaum ki zaalim adaaon se Daro

tum aao marg-e-shaadi hai na aao marg-e-naakaami
nazar mein ab rah-e-mulk-e-adam yuun bhi hai aur yuun bhi