Dard

phir sar-e-subh kisi dard ke dar vaa karne
dhaan ke khet se ik mauj-e-havaa aai hai

gham-e-firaaq mein taklif-e-sair-e-baagh na do
mujhe dimaagh nahin khanda-haa-e-bejaa kaa

kab Thahregaa dard ai dil kab raat basar hogi
sunte the vo aaeinge sunte the sahar hogi

ab khushi hai na koi dard rulaane vaalaa
ham ne apnaa liyaa har rang zamaane vaalaa

chamak hai dard hai kaundan paDi hai huuk uThti hai
mire pahlu mein kyuun yaaro ye dil hai yaa ki phoDaa hai

ishq se tabiat ne ziist kaa mazaa paayaa
dard ki davaa paai dard-e-be-davaa paayaa

ishrat-e-qatra hai dariyaa mein fanaa ho jaanaa
dard kaa had se guzarnaa hai davaa ho jaanaa

tamannaa dard-e-dil ki ho to kar khidmat faqiron ki
nahin miltaa ye gauhar baadshaahon ke khazinon mein

dard ho to davaa kare koi
maut hi ho to kyaa kare koi

paas jab tak vo rahe dard thamaa rahtaa hai
phailtaa jaataa hai phir aankh ke kaajal ki tarah

zindagi kyaa kisi muflis ki qabaa hai jis mein
har ghaDi dard ke paivand lage jaate hain

bahut milaa na milaa zindagi se gham kyaa hai
mataa-e-dard baham hai to besh-o-kam kyaa hai

zindagaani dard-e-sar hai yaar bin
kui hamaare sar kuun aa kar jhaaD de

kyuun nahin letaa hamaari tu khabar ai be-khabar
kyaa tire aashiq hue the dard-o-gham khaane ko ham

ab tiraa zikr bhi shaayad hi ghazal mein aae
aur se aur hue dard ke unvaan jaanaan

kuchh ham ko imtiyaaz nahin saaf o durd kaa
ai saaqiyaan-e-bazm bayaarid harche hast

dil-e-naadaan tujhe huaa kyaa hai
aakhir is dard ki davaa kyaa hai

dil hi to hai na sang-o-khisht dard se bhar na aae kyuun
roeinge ham hazaar baar koi hamein sataae kyuun

ik ye bhi to andaaz-e-ilaaj-e-gham-e-jaan hai
ai chaaragaro dard baDhaa kyuun nahin dete

jaraahat-tohfa almaas-armughaan daagh-e-jigar hadiya
mubaarakbaad 'asad' gham-khvaar-e-jaan-e-dardmand aayaa