tujh se māñgūñ maiñ tujhī ko ki sabhī kuchh mil jaa.e — Shayari Of Ameer Minai

vo phuul sar chaḌhā jo chaman se nikal gayā
izzat use milī jo vatan se nikal gayā

achchhe iisā ho marīzoñ kā ḳhayāl achchhā hai
ham mare jaate haiñ tum kahte ho haal achchhā hai

kartā maiñ dardmand tabīboñ se kyā rujūa
jis ne diyā thā dard baḌā vo hakīm thā

hai javānī ḳhud javānī kā siñgār
sādgī gahna hai is sin ke liye

baaqī na dil meñ koī bhī yā rab havas rahe
chaudah baras ke sin meñ vo lākhoñ baras rahe

vasl ho jaa.e yahīñ hashr meñ kyā rakkhā hai
aaj kī baat ko kyuuñ kal pe uThā rakkhā hai