aaj paivand ki zarurat hai — Fahmi Badayuni

kaash vo raaste mein mil jaae
mujh ko munh pher kar guzarnaa hai

khuun pilaa kar jo sher paalaa thaa
us ne circus mein naukri kar li

pareshaan hai vo jhuTaa ishq kar ke
vafaa karne ki naubat aa gai hai

Tahalte phir rahe hain saare ghar mein
tiri khaali jagah ko bhar rahe hain

tire moze yahin par rah gae hain
main in se apne dastaane banaa luun

puchh lete vo bas mizaaj miraa
kitnaa aasaan thaa ilaaj miraa