Ishq

kaan meñ hai tere motī āb-dār
yā kisī āshiq kā aañsū bolnā

vo āshiqī ke khet meñ sābit qadam huā
jo koī zaḳhm-e-ishq liyā dil kī Dhaal par

ishq ne 'ġhālib' nikammā kar diyā
varna ham bhī aadmī the kaam ke

maktab-e-ishq kā moallim huuñ
kyuuñ na ho.e dars-e-yār kī takrār

tirī abrū hai mehrāb-e-mohabbat
namāz-e-ishq mere par huī farz

hamārā ishq ravāñ hai rukāvaToñ meñ 'zafar'
ye ḳhvāb hai kisī dīvār se nahīñ ruktā

hamārā 'mīr'-jī se muttafiq honā hai nā-mumkin
uThānā hai jo patthar ishq kā to halkā bhārī kyā

sitāroñ se aage jahāñ aur bhī haiñ
abhī ishq ke imtihāñ aur bhī haiñ

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

ishq se tabī.at ne ziist kā mazā paayā
dard kī davā paa.ī dard-e-be-davā paayā

ishq kā duur kare dil se jo dhaḌkā ta.avīz
is dhaḌāke kā koī ham ne na dekhā ta.avīz

hosh vāloñ ko ḳhabar kyā be-ḳhudī kyā chiiz hai
ishq kiije phir samajhiye zindagī kyā chiiz hai

āshiq huuñ pa māshūq-farebī hai mirā kaam
majnūñ ko burā kahtī hai lailā mire aage

gar baazī ishq kī baazī hai jo chāho lagā do Dar kaisā
gar jiit ga.e to kyā kahnā haare bhī to baazī maat nahīñ

us bevafā ne ham ko agar apne ishq meñ
rusvā kiyā ḳharāb kiyā phir kisī ko kyā

be-ishq umr kaT nahīñ saktī hai aur yaañ
tāqat ba-qadr-e-lazzat-e-āzār bhī nahīñ

'farāz' ishq kī duniyā to ḳhūb-sūrat thī
ye kis ne fitna-e-hijr-o-visāl rakkhā hai

kufr-o-īmāñ do nadī haiñ ishq kiiñ
āḳhirash dono kā sañgam hovegā

ġhair taraf kyūñki nazar kar sakūñ
ḳhauf hai tujh ishq ke jāsūs kā

kyuuñ nahīñ letā hamārī tū ḳhabar ai be-ḳhabar
kyā tire āshiq hue the dard-o-ġham khāne ko ham