muflisi paanv ki zanjir thi aur — Zyesha Usmaan

baDi viraani hai dil ke shajar par
mohabbat ke parinde uD gae kyaa

har baat dil ki lab pe nahin laanaa laazmi
kuchh guftugu mein bhi adab aadaab chaahiye

bujhne nahin diyaa ise furqat ke baa'd bhi
yaadon se teri dil ko farozaan rakhaa sadaa

log aaeinge bahut chhoD ke jaaeinge bahut
har kisi ko na kaleje se lagaa kar rakhiye

kaisaa ye marhala hai ki ik dusre se ham
kahne ko aashnaa hain magar aashnaa nahin

ai shakhs tujh se tark-e-ta'alluq kaa gham nahin
gham ye hai main ne khud ko tire saath kho diyaa