Shayari Of Abbas Tabish

"kyoñ kar dikhā.ī deve koī sharar hamārā andar kī aag par hai raqs-e-digar hamārā taslīm kījiye haq us shaḳhs par hamārā vo 'aam hai to hogā hai ḳhās-kar hamārā fursat nahīñ hai yārāñ dil kī taraf se ham ko is pā.īñ-bāġh meñ hai sair-o-safar hamārā tujh ghar ke rāste meñ ham apne muntazir the ai kaash us taraf se hotā guzar hamārā ham ḳhaak par raheñge yā chaak par raheñge kyā faisla kiyā hai ai kūza-gar hamārā jab raat kī siyāhī peḌoñ pe gir rahī thī jangal se ho rahā thā us dam guzar hamārā ham dekh kar kisī ko dariyā meñ kuud jaa.eñ itnā bhī haq nahīñ kyā us shaḳhs par hamārā miTTī ko gholne meñ ḳhud ghul rahā hai yā'nī tausī' chāhtā hai dast-e-hunar hamārā neze kī nok se vo miTTī meñ DhūñDte haiñ miltā nahīñ hai un ko maqtal meñ sar hamārā jab ban gayā to is kī duniyā misāl degī tā'mīr ho rahā hai malbe se ghar hamārā is ko khurach rahe haiñ patthar pe kaa.ī jaise pairoñ pe jam gayā hai shauq-e-safar hamārā donoñ taraf se ham to majbūr ho ga.e haiñ koī idhar hamārā koī udhar hamārā ik dūsre se jaise paivand ho ga.e hoñ rakkhā hai haath kab se us haath par hamārā ab chauk meñ paḌe haiñ ham janglī kabūtar ġhurfe kī jāliyoñ meñ hotā thā ghar hamārā ik din khulegā ham par ganjīna-e-ma'ānī kashkol toḌ degā dast-e-hunar hamārā muñh moḌ leñ to duniyā duniyā nahīñ rahegī dekhā nahīñ hai us ne sarf-e-nazar hamārā ab apne paañv apne dil par paḌeñge 'tābish' andar kī samt hogā aglā safar hamārā"

"shāmil mire ġhubār meñ sahrā agar na ho mujh se to ik qadam bhī ye vahshat basar na ho patthar zamīñ pe pheñk ke chhīñTe uḌā.ūñ maiñ gar mujh ko terī jhiil sī āñkhoñ kā Dar na ho tujh se nahīñ milā thā magar chāhtā thā maiñ tū ham-safar ho aur kahīñ kā safar na ho ye kah ke mere ghar se farishte chale ga.e vo koī ghar hai jis meñ parindoñ kā ghar na ho dīdār chāhtā hai tahajjud-guzār-e-'ishq yā-rab qubūliyat kī ghaḌī tak sahar na ho tū jāntā nahīñ mire mālik-makān ko ai dost koī chiiz idhar kī udhar na ho tujh se bichhaḌ ke is liye terā hai intizār vo koī zindagī hai jo bār-e-digar na ho āñkhoñ kā kyā banegā tire ḳhāl-o-ḳhad kī ḳhair ai dost zindagī se ziyāda basar na ho 'tābish' ba-zo’m-e-ḳhud jinheñ 'izzat huī nasīb vo chāhte haiñ aur koī mo'tabar na ho"

"dhuñdlī samtoñ meñ agar kuuñj kā par mil jaa.e phir to ai dar-badarī mujh ko bhī ghar mil jaa.e aur hī rang meñ ho barg-o-samar kā honā jis kī ḳhvāhish hai mujhe vo bhī agar mil jaa.e muntazir jis kā huuñ vo aa.e zarūrī to nahīñ ye bhī mumkin hai koī aur ḳhabar mil jaa.e ḳhāk-o-ḳhvāb ek hī thailī ke haiñ chaTTe-baTTe dil kī marzī hai jidhar chāhe udhar mil jaa.e ehtimām aisā ho fursat ke dinoñ meñ dil kā ek Dar ḳhatm ho aur dūsrā Dar mil jaa.e is tarah se na guzārūñgā yaqīnan tujh ko zindagī tū jo mujhe bār-e-digar mil jaa.e"

"hameñ pachhāḌ ke kyā haisiyat tumhārī thī vo jang tum bhī na jiite jo ham ne haarī thī aur ab tumheñ bhī har ik shaḳhs achchhā lagtā hai ga.e dinoñ meñ yahī kaifiyat hamārī thī hamāre chehre dam-e-sub.h dekhte aa kar ki ham ne raat nahīñ zindagī guzārī thī bichhaḌ gayā vo judā.ī ke moḌ se pahle ki us ke baa'd mohabbat meñ sirf ḳhvārī thī"

"bichhaḌ ke ham se jo kho.e ga.e haiñ raah ke biich sahar hue unheñ dekhoge ḳhema-gāh ke biich ham ek duuje se milne kā Dhang bhuul ga.e ye sāniha bhī huā shahr-e-dād-ḳhvāh ke biich kahāñ vo log jinheñ jangaloñ meñ shaam huī kahāñ vo ashk ki Thahre rahe nigāh ke biich kisī ne mujh ko pukārā hai mere lahje meñ ye ittifāq bhī aksar huā hai raah ke biich vo sāth-sāth rahā bū-e-gulsitāñ kī tarah ghumāyā us ne bahut dil kī sair-gāh ke biich khulā ki gumbad-e-gardūñ ke ham mujāvir haiñ jab ek 'umr guzār aa.e ḳhānqāh ke biich"

"maiñ us kī nā-murādī ko ġham-e-hāsil samajhtā huuñ jise manzil nahīñ miltī use manzil samajhtā huuñ maiñ apnī baat se phirtā nahīñ ḳhanjar ke phirne tak jise qātil samajhtā huuñ use qātil samajhtā huuñ tamāñche ek do merī taraf se bhī mire muñh par ki ḳhud ko aaj kal maiñ bhī isī qābil samajhtā huuñ tum aa.e ho magar mujh par girānī kā ye 'ālam hai tumhāre haath ko siine pe rakkhī sil samajhtā huuñ mujhe ummīd hai paanī mire ghar tak na aa.egā shigāfoñ par rakhe hāthoñ ko maiñ sāhil samajhtā huuñ agarche ye asar-andāz hotī hai mire ghar par magar maiñ is udāsī ko ġhizā-e-dil samajhtā huuñ to kyā ai shaḳhs terī justujū se thak chukā huuñ maiñ ki tū hāsil nahīñ lekin tujhe hāsil samajhtā huuñ"

"dukhoñ kā dasht āñkhoñ kā samundar chhoḌ aayā huuñ jo ghar meñ lā na sakta thā vo bāhar chhoḌ aayā huuñ tum aglī bārishoñ ke baa'd jākar dekhnā pyāre tumhārā naam dīvāroñ pe likh kar chhoḌ aayā huuñ mohabbat kī hai us ghar meñ rihā.ish to nahīñ kī hai abhī to sirf darvāze pe bistar chhoḌ aayā huuñ tirī bāñhoñ meñ aa kar bhī yahī mahsūs hotā hai ki ḳhud ko vaqt ke rahm-o-karam par chhoḌ aayā huuñ abhī kuchh der meñ phailegī ḳhushbū saarī bastī meñ vahāñ ke ik darīche meñ gul-e-tar chhoḌ aaya huuñ ḳhudā-na-ḳhvāsta maiñ bhī agar banbās luuñ 'tābish' vahāñ kis ko batā.ūñgā bharā ghar chhoḌ aaya huuñ"

"ik chaTā.ī thī mirī ek piyāla thā mirā 'aam ho kar bhī yahī ḳhaas havāla thā mirā maiñ ki nuqsān ke mānind milā thā ḳhud ko 'ishq karnā hī mirī jaan izāla thā mirā ab tujhe yaad nahīñ hai to dilā detā huuñ un dinoñ ek jahāñ jānñe vaalā thā mirā 'ishq ne zulm kamāne kī ijāzat hī na dī varna ye shahr-e-sitam ek nivāla thā mirā muḌte hī dasht se dargāh kī jānib 'tābish' chāñd bhī chāñd kahāñ paañv kā chhālā thā mirā"

"kuchh is liye bhī hamārā nishāna bantā hai hamāre sāmne aa kar zamāna bantā hai hamāre jismoñ kī īñTeñ lagā.ī jaatī haiñ hameñ Thikāne lagā kar Thikāna bantā hai mirī sazā bhī yahī hai mirī jazā bhī yahī dukhī na ho ki mirā dil dukhānā bantā hai bahisht-e-bosa agar tujh se māñgte haiñ ham ham ahl-e-'ishq kā yeh mehnatāna bantā hai kareñ hisāb to phir qais kā zamāna bhī hamārī dar-ba-darī kā zamāna bantā hai havāla detā hai majnūñ safed bāloñ kā purānā hai nahīñ jitnā purānā bantā hai ki jaise shāḳh pe phuul aur āsmān pe chāñd kisī ne aanā ho aise to aanā bantā hai banāne vaale kisī din banā bhī de us ko tire huzūr koī panjgāna bantā hai"

"miTTī-miTTī ho kar bhī vo āñkhoñ meñ bhar aate haiñ koh-e-nidā ko jaane vaale log palaT kar aate haiñ un meñ sarāyat kar jaatā hai yuuñ merā pathrīlā-pan ab ruḳhsāroñ ke badle hāthoñ meñ patthar aate haiñ kyā merī tanhā.ī ne har dost ko tanhā kar Daalā vo jo kabhī milte hī na the vo milne aksar aate haiñ un mehmānoñ kī ḳhātir dahlīz pe baiThā rahtā huuñ mere ghar meñ rizq aatā hai aur kabūtar aate haiñ aur hī duniyā kī ḳhushbū aatī hai mere zaḳhmoñ se shaam tire nokīle panje kis ko chhū kar aate haiñ naata toḌne vaalo tum se jang nahīñ karne ke ham tum baiTho ham she'b-e-abī-tālib se ho kar aate haiñ"

"ye shahr roz hī bastā hai roz ujaḌtā hai magar ġhanīm ko kyā is se farq paḌtā hai ḳhudā ne ham meñ ye kyā qadr-e-mushtarak rakkhī ki merī aañkh tire lab se phuul jhaḌtā hai hamāre saath mohabbat kā jo sulūk bhī ho savāl ye hai ki duniyā kā kyā bigaḌtā hai shikastagī meñ bhī me'yār apne hote haiñ gire makān to apne hī paañv paḌtā hai yahī pasand nahīñ hai mujhe mohabbat meñ ye roz-roz jo duniyā se kaam paḌtā hai kuchh aisī jam ga.ī sanjīdgī mire ruḳh par kisī tarah se ye patthar nahīñ ukhaḌtā hai abhī jale the abhī bujh-bujhā ga.e 'tābish' havāoñ se to koī dam diyā bhī laḌtā hai"

"kaisā rang-o-raushnī kā qahr hai din Dhale bhī shahr meñ dopahr hai aadmī ab bhaag kar jaa.e kahāñ shahr ke chāroñ taraf bhī shahr hai mar gayā hai chāñd bhī chiḌiyoñ ke saath jhiil ke paanī meñ kitnā zahr hai hijr bhī palkeñ jhapakne lag gayā 'ishq kī duniyā meñ pichhlā pahr hai bas yahīñ tak hai ye dariyā ḳhuun kā isse aage titliyoñ kā shahr hai"