Shayari Of Abdullah Javed

"jānib-e-dar dekhnā achchhā nahīñ raah shab bhar dekhnā achchhā nahīñ āshiqī kī sochnā to Thiik hai āshiqī kar dekhnā achchhā nahīñ izn-e-jalva hai jhalak bhar ke liye aañkh bhar kar dekhnā achchhā nahīñ ik tilismī shahr hai ye zindagī pīchhe muḌ kar dekhnā achchhā nahīñ apne bāhar dekh kar hañs bol leñ apne andar dekhnā achchhā nahīñ phir na.ī hijrat koī darpesh hai ḳhvāb meñ ghar dekhnā achchhā nahīñ sar badan par dekhiye 'jāved' jī haath meñ sar dekhnā achchhā nahīñ"

"ruuh ko qālib ke andar jānñā mushkil huā lafz meñ ehsās ko pahchānñā mushkil huā le uḌī patte havā to shāḳh-e-gul be-bas huī phuul par saa.e kī chādar tānñā mushkil huā apne ḳhalvat-ḳhāna-e-dil se jo nikle to hameñ sab ke ġham meñ apnā ġham bhī jānñā mushkil huā vaqt ne jab aa.ina ham ko dikhāyā ro paḌe apnī sūrat aap hī pahchānñā mushkil huā is mashīnī-ahd meñ kyā zaat kyā irfān-e-zāt aadmī ko aadmī gardānanā mushkil huā justujū-e-la.al-o-gauhar se bhī baaz aa.e vo log ḳhirman-e-ḳhāshāk jin se chhānñā mushkil huā dil na chhoTā kījiye nā-qadrī-e-ahbāb par aib-jūyoñ ko hunar pahchānñā mushkil huā kyā kareñ 'jāved' is bahrūpiyoñ ke daur meñ gul ko gul kāñTe ko kāñTā mānñā mushkil huā"

"koī rishta na ho phir bhī rishte bahut aap apne nahīñ aap apne bahut raaz rakhte na ham is ta.alluq ko gar log rote bahut log hañste bahut dil kī tanhā.iyoñ kā mudāvā nahīñ ghuum kar ham ne dekhe haiñ mele bahut is hī buniyād par kyuuñ na mil jaa.eñ ham aap tanhā bahut ham akele bahut jab thī manzil nazar meñ to rasta thā ek gum huī hai jo manzil to raste bahut ḳhvāb tābīr ke moḌ par kho ga.e yuuñ ki tābīr-dāñ paḌ ke so.e bahut peḌ ko kāTne vaale dekheñ zarā peḌ par haiñ bane āshiyāne bahut Dūbne vaale shāyad ye batlā sakeñ Dūbne ko sahāre ke tinke bahut"

"ham kyā kaheñ ki ābla-pā.ī se kyā milā duniyā milī kisī ko kisī ko ḳhudā milā ham ḳhud ko dekhne ke to laa.eq na the magar har aa.ina hamārī taraf dekhtā milā aisā thā kaun ruuh ke andar jo dekhtā har sat.h meñ vagarna hameñ jāñchtā milā insān aur vaqt meñ kab dostī rahī har lamha aadmī kā lahū chāTtā milā insāñ samajh ke ham ne use dil meñ rakh liyā insāñ ke ruup meñ magar ik devtā milā dildār bhī mile hameñ par is ko kyā kareñ koī ḳhayāl sā to koī ḳhvāb sā milā"

"har lamha marg-o-zīst meñ paikār dekhnā khīñchī huī hai vaqt ne talvār dekhnā is dopahar kī dhuup meñ saaya kahāñ mile din Dhal chale to phir kahīñ dīvār dekhnā ab to safar ke saḳht marāhil haiñ aur ham jab paas aa.e manzil-e-dildār dekhnā be-tābiyāñ hoñ laakh magar us ke rū-ba-rū chhoḌeñ na haath dāman-e-pindār dekhnā ai maslahat kī past zamīnoñ ke bāsiyo kitnī bulandiyāñ haiñ sar-e-dār dekhnā zarra bhī āftāb se kamtar nahīñ yahāñ yaaro magar ba-dīda-e-bedār dekhnā 'jāved' ham haiñ aur hai ehsās kā ḳhulūs yāroñ ke paas jhuuT ke tūmār dekhnā"

"ik sail-e-be-panāh kī sūrat ravāñ hai vaqt tinke samajh rahe haiñ ki vahm-o-gumāñ hai vaqt parkho to jaise teġh-e-do-dam hai khiñchī huī Taalo to ek uḌtā huā sā dhuāñ hai vaqt jo dil hadaf huā ho vo shāyad batā sake nāvak bhī aap aap hī chaḌhtī kamāñ hai vaqt ham us ke saath haiñ ki vo hai apne saath saath kis ko ḳhabar ki ham haiñ ravāñ yā ravāñ hai vaqt tārīḳh kyā hai vaqt ke qadmoñ kī gard hai qaumoñ ke auj-o-past kī ik dāstāñ hai vaqt agle suḳhan-varoñ ne jise āsmāñ kahā sach pūchhiye to aaj vahī āsmāñ hai vaqt hamdam nahīñ rafīq nahīñ ham-navā nahīñ lekin hamārā sab se baḌā rāzdāñ hai vaqt kal kā.enāt apne jilau meñ liye hue 'jāved' hast-o-būd kā ik kārvāñ hai vaqt"

"lage hai āsmāñ jaisā nahīñ hai nazar aatā hai jo hotā nahīñ hai tum apne aks meñ kyā dekhte ho tumhārā aks bhī tum sā nahīñ hai mile jab tum to ye ehsās jaagā ab aage kā safar tanhā nahīñ hai bahut sochā hai ham ne zindagī par magar lagtā hai kuchh sochā nahīñ hai yahī jaanā hai ham ne kuchh na jaanā yahī samjhā hai kuchh samjhā nahīñ hai yaqīñ kā dā.era dekhā hai kis ne gumāñ ke dā.ere meñ kyā nahīñ hai yahāñ to silsile hī silsile haiñ koī bhī vāqi.a tanhā nahīñ hai bañdhe haiñ kā.enātī bandhanoñ meñ koī bandhan magar dikhtā nahīñ hai ho kis nisbat se tum 'jāved' sāhab na honā to hai yaañ honā nahīñ hai"

"chamkā jo chāñd raat kā chehra nikhar gayā māñge kā nuur bhī to baḌā kaam kar gayā ye bhī bahut hai saiñkaḌoñ paude hare hue kyā ġham jo bārishoñ meñ koī phuul mar gayā sāhil pe log yūñhī khaḌe dekhte rahe dariyā meñ ham jo utre to dariyā utar gayā saaya bhī aap kā hai faqat raushnī ke saath DhūñDoge tīrgī meñ ki saaya kidhar gayā ham jis ke intizār meñ jaage tamām raat aayā bhī vo to ḳhvāb kī sūrat guzar gayā ham ne to gul kī chāñd kī taare kī baat kī sab ahl-e-ajnuman kā gumāñ aap par gayā ghar hī nahīñ rahā hai salāmat batā.eñ kyā 'jāved' ke ba.ad sail-e-balā kis ke ghar gayā"

"nañge paañv kī aahaT thī yā narm havā kā jhoñkā thā pichhle pahar ke sannāTe meñ dil dīvāna chauñkā thā pāñchoñ havās kī bazm sajā kar us kī yaad meñ baiThe the ham se pūchho shab-e-judā.ī kab kab pattā khaḌkā thā aur bhī the us kī mahfil meñ bāteñ sab se hotī thiiñ sab kī aañkh bachā kar us ne ham ko tanhā dekhā thā duniyā to duniyā hī Thahrī rañg badaltī rahtī hai dukh to ye hai dhyān kisī kā ghaTtā baḌhtā saayā thā kaisā shikva kaisī shikāyat dil meñ yahī socho 'jāved' tum hī ga.e the us kī galī meñ vo kab tum tak aayā thā"

"chāñdnī raat meñ har dard sañvar jaatā hai jaane kyā kyā sar-e-ehsās bikhar jaatā hai dekhte ham bhī haiñ kuchh ḳhvāb magar haa.e re dil har na.e ḳhvāb kī ta.abīr se Dar jaatā hai maut kā vaqt muayyan hai to phir baat hai kyā kaun hai mujh meñ jo har saañs pe mar jaatā hai dil meñ gaḌ jaatī hai jab sā.at-e-māzī kī salīb vaqt ruk jaatā hai insān guzar jaatā hai"

"samundar paar aa baiThe magar kyā na.e mulkoñ meñ ban jaate haiñ ghar kyā na.e mulkoñ meñ lagtā hai nayā sab zamīñ kyā āsmāñ kyā aur shajar kyā udhar ke log kyā kyā sochte haiñ idhar baste haiñ ḳhvāboñ ke nagar kyā har ik raste pe chal kar sochte haiñ ye rasta jā rahā hai apne ghar kyā kabhī raste ye ham se pūchhte haiñ musāfir ho rahe haiñ dar-ba-dar kyā kabhī sochā hai miTTī ke alāva hameñ kahte haiñ ye dīvār-o-dar kyā yahāñ apne bahut rahte haiñ lekin kisī ko bhī kisī kī hai ḳhabar kyā kise fursat ki in bātoñ pe soche mashīnoñ ne kiyā hai jaan par kyā mashīnoñ ke ghanere jañgaloñ meñ bhaTaktī ruuh kyā us kā safar kyā yahāñ ke aadmī haiñ do ruḳhe kyuuñ mohazzab ho ga.e haiñ jānvar kyā adhūre kaam chhoḌe jā rahe haiñ idhar ko ā.eñge bār-e-digar kyā ye kis ke ashk haiñ auj-e-falak tak koī rotā rahā hai raat bhar kyā chaman meñ har taraf aañsū haiñ 'jāved' tirī hālat kī sab ko hai ḳhabar kyā"

"phuul ke laa.eq fazā rakhnī hī thī Dar havā se thā havā rakhnī hī thī go mizājan ham judā the ḳhalq se saath meñ ḳhalq-e-ḳhudā rakhnī hī thī yuuñ to dil thā ghar faqat allāh kā but jo paale the to jā rakhnī hī thī tark karnī thī har ik rasm-e-jahāñ haañ magar rasm-e-vafā rakhnī hī thī sirf kaabe par na thī hujjat tamām bād-e-kāba karbalā rakhnī hī thī"