Shayari Of Nazeer Akbarabadi

"shab-e-mah meñ dekh us kā vo jhamak jhamak ke chalnā kiyā intiḳhāb mah ne ye chamak chamak ke chalnā ravish-e-sitam meñ aanā to qadam uThānā jaldī jo rah-e-karam meñ aanā to ThiThak ThiThak ke chalnā na dhaḌak ho jo nikalnā to sar-e-ḳhatar pe Thokar jo nazar guzar se Darnā to jhijak jhijak ke chalnā jo navāzishoñ pe aanā to ragaḌ ke dosh jaanā jo sar-e-itāb honā to phaTak phaTak ke chalnā hai khubā 'nazīr' ab to mire jī meñ us sanam kā vo akaḌ ke dhaj dikhānā vo humak humak ke chalnā"

"khile gul sabza nuzhat-bār hai kyā kyā bahāreñ haiñ sabā hai rang-o-bū hai yaar hai kyā kyā bahāreñ haiñ hujūm-e-abr hai chamke hai barq aur meñh barastā hai nasha hai tāzgī hai yaar hai kyā kyā bahāreñ haiñ sadā-e-bulbulāñ hai aabjū hai sehn-e-gulshan hai saman hai sarv hai gulnār hai kyā kyā bahāreñ haiñ sanam ke lab meñ paan hāthoñ meñ mehñdī pair haiñ rangīñ kanārī hai dhanak hai haar hai kyā kyā bahāreñ haiñ 'nazīr' ab aish kī piitā hai mai har dam ye kah kah kar chaman hai gul hai gul-ruḳhsār hai kyā kyā bahāreñ haiñ"

"le ke dil mehr se phir rasm-e-jafā-kārī kyā tum dil-ārām ho karte ho dil-āzārī kyā tum se jo ho so karo ham nahīñ hone ke ḳhafā kuchh hameñ aur se karnī hai na.ī yaarī kyā juuñ hubāb aa.e haiñ milne ko na ho chīñ-ba-jabīñ ham se ik dam ke liye karte ho be-zārī kyā teġh-e-abrū kī to ulfat ne kiyā dil ko do-nīm dekheñ ab kartī hai kākul kī giraftārī kyā phir sināñ mizzha-e-dil par vo uThātā hai 'nazīr' zaḳhm-e-shamshīr-e-nigah aah nahīñ kaarī kyā"

"sanam ke kūche meñ chhup ke jaanā agarche yuuñ hai ḳhayāl dil kā pa vo to jaate hī taaḌ legā phir aanā hogā muhāl dil kā guhar ne ashkoñ ke yaañ nikal kar jhamak dikhā.ī jo apnī har dam to ham ne jaanā ki motiyoñ se bharā hai pahlū meñ qaal dil kā kabhī ishārat kabhī lagāvaT kabhī tabassum kabhī takallum ye tarzeñ Thahreñ to ham se phir ho bhalā jī kyūñkar sambhāl dil kā vo zulf-e-pur-pech-o-ḳham hai us kī phañsā to niklegā phir na hargiz hamārā kahnā hai sach are jī tū kaam us se na Daal dil kā maiñ lahza lahza huuñ khīñch laatā vo phir usī kī taraf hai jaatā karūñ 'nazīr' us kī fikr maiñ kyā hai ab to mere ye haal dil kā"

"sheva-e-nāz hosh chhal jaanā tarz-e-raftār dil kuchal jaanā saf-e-mizhgāñ ke jhok se gir kar ham se kab ho sakā sambhal jaanā us ne aane kahā hai sub.h ai ashk tū palak par na ek pal jaanā ham abhī muntazir haiñ aane ke din Dhalegā to tū bhī Dhal jaanā dil ne sīkhā hai be-tarah se 'nazīr' bin kahe bin sune nikal jaanā"

"thī chhoTī us ke mukhḌe par kal zulf-e-musalsal aur tarah phir dekhā aaj to us gul ke the kākul ke bal aur tarah vo dekh jhiḌaktā hai ham ko kar ġhussa har dam aur hameñ hai chain usī ke milne se zinhār nahīñ kal aur tarah ma.alūm nahīñ kyā baat kahī ġhammāz ne us se jo ham se thiiñ pahlī bāteñ aur namat ab bole hai chanchal aur tarah dil mujh se us ke milne ko kahtā hai to us ke paas mujhe jab le pahuñchā thā bhes badal phir ab ke le chal aur tarah hai kitne dinoñ se ishq 'nazīr' us yaar kā ham ko jis kī haiñ sub.h aur biran shaam aur phaban aaj aur duvah kal aur tarah"

"na Toko dosto us kī bahār nām-e-ḳhudā yahī ab ek hai yaañ gul-ezār nām-e-ḳhudā ye vo sanam hai parī-rū ki jis pe hotī thiiñ hazār jaan se pariyāñ nisār nām-e-ḳhudā usī sanam kī nigāhoñ kī barchhiyāñ yaaro huī haiñ mere kaleje ke paar nām-e-ḳhudā usī ke nashtar-e-mizhgāñ meñ ab vo tezī hai ki jis se hote haiñ ham dil-figār nām-e-ḳhudā usī sanam ke ruḳh o zulf ke tasavvur meñ hamārī guzre hai lail-o-nahār nām-e-ḳhudā galī meñ kūcha o bāzār meñ ham ab din raat usī ke vāste phirte haiñ ḳhvār nām-e-ḳhudā usī ke sar kī qasam hai ki ham to mar jaate agar na hotā ye gul-rū nigār nām-e-ḳhudā bane haiñ yaañ jo ka.ī dair aur sanam-ḳhāne udhar jo hotā hai us kā guzār nām-e-ḳhudā uThā ke siina jhaTak baazū aur banā kar dhaj chale hai jis ghaḌī Thokar ko maar nām-e-ḳhudā qadam qadam pe barahman kaheñ haiñ bismillāh sanam bhī kahte haiñ sab baar baar nām-e-ḳhudā ġharaz jidhar ko nikaltā hai ye to har ik ke zabāñ se nikle hai be-iḳhtiyār nām-e-ḳhudā 'nazīr' ek ġhazal aur kah ki tere suḳhan haiñ ab to sab guhar-e-āb-dār nām-e-ḳhudā"

"butoñ kī majlis meñ shab ko mah-rū jo aur Tuk bhī qayām kartā kunisht vīrāñ sanam ko banda brahmnoñ ko ġhulām kartā ḳharāb ḳhasta samajh ke tū ne piyāre mujh ko abas nikālā jo rahne detā tū gul-ruḳhoñ meñ qasam hai merī maiñ naam kartā karoḌoñ dil jo mue paḌe haiñ nikalte ḳhūnīñ kafan se nālāñ qayāmat aa jaatī jo vo qāmat galī meñ apnī ḳhirām kartā na itne qisse na jañg hotī piyāre tere milāp uupar raqīb aapī se zahr khāne jo vasl kā tū payām kartā vo sarv-qāmat jo muskurā kar chaman meñ jaatā to muskurā kar taḌaptī bulbul sisaktī qumrī guloñ pe hañsnā harām kartā bhalā huā jo naqāb tū ne uThāyā chehre se hai parī-rū vagarna siine se dil taḌap kar nigah meñ aa kar maqām kartā jo zulfeñ mukhḌe pe khol detā sanam hamārā to phir ye gardūñ na din dikhātā na shab bitātā na sub.h laatā na shaam kartā vo bazm apnī thī mai-ḳhurī kī farishte ho jaate mast be-ḳhud jo shaiḳh-jī vaañ se bach ke aate to phir maiñ un ko salām kartā 'nazīr' terī ishāratoñ se ye bāteñ ġhairoñ kī sun rahā hai vagarna kis meñ thī tāb-o-tāqat jo us se aa kar kalām kartā"

"qasr-e-rañgīñ se guzar bāġh-o-gulistāñ se nikal hai vafā-pesha tū mat kūcha-e-jānāñ se nikal nik.hat-e-zulf ye kis kī hai ki jis ke aage huī ḳhajlat-zada bū sumbul-o-raihāñ se nikal go bahār ab hai vale roz-e-ḳhizāñ ai bulbul yak-qalam nargis o gul jāveñge bustāñ se nikal imtihāñ karne ko yuuñ dil se kahā ham ne raat ai dil-e-ġham-zada is kākul-e-pechāñ se nikal khā ke sau pech kahā maiñ to nikalne kā nahīñ magar ai dushman-e-jāñ chal tū mire haañ se nikal ho pareshānī se jis kī mujhe sau jam.iyyat kis tarah jā.ūñ maiñ us zulf-e-pareshāñ se nikal laakh zindān-e-pur-āfāt meñ hotā hai vo qaid jo koī jaatā hai is taur ke zindāñ se nikal mujh se mumkin nahīñ mahbūb kī qat.a-e-ulfat garche maiñ jā.ūñgā is ālam-e-imkāñ se nikal chaah meñ mujh ko ye murshid kā hai irshād 'nazīr' aabrū chāhe to mat chāh-e-zanaḳhdāñ se nikal"

"jo pūchhā maiñ ne yaañ aanā mirā manzūr rakhiyegā to sun kar yuuñ kahā ye baat dil se duur rakhiyegā bahut roiiñ ye āñkheñ aur paḌī din raat rotī haiñ ab in ko chashm bhī kījegā yā nāsūr rakhiyegā jo parda bazm meñ muñh se uThāte ho to ye kah do ki phir yaañ sham.a ke jalne kā kyā mazkūr rakhiyegā diyā dil ham ne tum ko aur to ab kyā kaheñ lekin ye vīrāna tumhārā hai use ma.amūr rakhiyegā 'nazīr' ab to dil-o-jāñ se tumhārā ho chukā banda miyāñ apne ġhulāmoñ meñ use mash.hūr rakhiyegā"

"saaqī zuhūr-e-sub.h o tarashshah hai nuur kā de mai yahī to vaqt hai nuur o zuhūr kā kūche meñ us ke jis ko jagah mil ga.ī vo phir maa.il huā na sehn-e-chaman ke surūr kā ye gul jo ham ne haath pe khaa.e haiñ rū-ba-rū ham ko yahī milā hai tabarruk huzūr kā sīmāb jis ko kahte haiñ sīmāb ye nahīñ dil aab ho gayā hai kasī nā-subūr kā mai pī ke āshiqī ke ḳharābāt meñ 'nazīr' ne Dar hai mohtasib kā na sadrussudūr kā"

"lutf-e-tashrīf jo 'ishq us ke ne āġhāz kiyā ham ne tā'zīm kī aur jhap dar-e-dil baaz kiyā dekh kar us ko butāñ sehr sab apnā bhūle us shah-e-husn ke 'ālam ne ye e.ajāz kiyā lutf se jis kī taraf ek nigah kī us ne us ko sau qadr-o-sharaf se vahīñ mumtāz kiyā jis ke haañ paañv rakhā us ne to kyā kyā us ko ālam-e-zāhir-o-bātin meñ sar-afrāz kiyā ham to kis gintī meñ haiñ husn ne us ke to 'nazīr' haiñ jo mā'shūq unheñ āshiq-e-jāñbāz kiyā"