Shayari Of Raoof Khair

khilaune kī taḌap meñ ḳhud khilaunā vo na ban jaa.e
mirā bachcha saḌak par rezgārī le ke niklā hai

khulegā un pe jo bainassutūr paḌhte haiñ
vo harf harf jo aḳhbār meñ nahīñ aatā

haDDiyāñ baap kī guude se huī haiñ ḳhālī
kam se kam ab to ye beTe bhī kamāne lag jaa.eñ

"tā-ba-kai manzil-ba-manzil ham musāfir bhāgte aañkh ab Thahrī huī hai aur manāzir bhāgte ai harīf-e-har-qadam shah-māt se bachne kī soch is bisāt-e-ḳhāk se kyā ham se shātir bhāgte ham to aa.e haiñ yahāñ miTne miTāne ke liye is zamīn-e-karbalā se kis kī ḳhātir bhāgte bas meñ aa jaane kā jazba bas meñ karne kī havas ḳhāk-o-bād-o-āb-o-ātish bhī haiñ qāsir bhāgte sar kahīñ paañv kahīñ āñkheñ kahīñ chehra kahīñ is havas meñ kho ga.ī pahchān āḳhir bhāgte 'ḳhair' shab-ḳhūñ maar kar chhup jaane vaale ham nahīñ ma.arka sar karne nikle haiñ to kyā phir bhāgte khod lete haiñ kuaañ shahdāb pā lete haiñ 'ḳhair' is zamīn-e-saḳht se kyā ham se shā.ir bhāgte"

"koī bhī zor ḳharīdār par nahīñ chaltā ki kārobār to aḳhbār par nahīñ chaltā ham aap apnā garebān chaak karte haiñ hamārā bas hī to sarkār par nahīñ chaltā kuchh aur chāhiye taskīn-e-jism-o-jāñ ke liye hamārā kaam to dīdār par nahīñ chaltā maiñ jāntā huuñ mujhe kis kā saath denā hai maiñ billī ban ke to dīvār par nahīñ chaltā usuul jitne haiñ laagū hamīñ pe hote haiñ aur ek yār-e-tarah-dār par nahīñ chaltā unheñ lihāz nahīñ hai jo merī marzī kā to maiñ bhī marzi-e-aġhyār par nahīñ chaltā na jaane kab tumheñ auqāt apnī dikhlā de ab itnā zulm bhī nādār par nahīñ chaltā mire suḳhan kā bahāna haiñ qāfiya o radīf maiñ sher kahtā huuñ kuchh taar par nahīñ chaltā ra.uuf 'ḳhair' pahuñchtā vahīñ hai hir-phir kar ki iḳhtiyār dil-e-zār par nahīñ chaltā"

"biktī nahīñ faqīr kī jholī hī kyuuñ na ho chāhe ra.īs-e-shahr kī bolī hī kyuuñ na ho ehsān-e-rañg ġhair uThāte nahīñ kabhī apne lahū se khel vo holī hī kyuuñ na ho sach to ye hai ki haath na aanā kamāl hai duniyā se khel āñkh-micholī hī kyuuñ na ho hai āsmāñ vasī.a zamīñ tañg hī sahī ta.amīr kar kahīñ koī kholī hī kyuuñ na hū haq par jo hai vahī sar o shāna buland hai hai varna be-bisāt vo Tolī hī kyuuñ na ho dariyā kī kyā bisāt ki mujh ko Dubo sake kashtī kahīñ kahīñ mirī Dolī hī kyuuñ na ho talḳhī meñ bhī maza hai jo tū ḳhush-mazāq hai pak jaa.e to bhalī hai nimolī hī kyuuñ na ho kuchh to hadīs 'ḳhair' samajhne ke kar jatan har-chand be-maza mirī bolī hī kyuuñ na ho"

"lubhā rahī to hai duniyā chamak damak kī mujhe magar hayāt gavārā nahīñ dhanak kī mujhe hamesha apnī laḌā.ī maiñ aap laḌtā huuñ nahīñ rahī kabhī hājat kisī kumak kī mujhe bahut dinoñ se zamān o makān haa.il haiñ ki aas bhī na rahī ab tirī jhalak kī mujhe mire qalam kī jo zad meñ ye bahr o bar aate duhā.ī dene lage naan aur namak kī mujhe mirā gumān yaqīñ meñ badaltā rahtā hai samajhne vaale bhale hī samajh leñ shakkī mujhe chunāñche gardish-e-ayyām thak ke baiTh ga.ī maiñ saḳht-jān huuñ kyā pīstī ye chakkī mujhe isī liye to maiñ nimTā rahā huuñ kaam apne maiñ jāntā huuñ ki mohlat hai aaj tak kī mujhe adā kiyā usī sikke meñ be-jhijak maiñ ne huī jahāñ kahīñ mahsūs bū hitak kī mujhe ḳharāb-hāl ye be-'ḳhair' o be-adab ho kar bhaTak na jaa.e kahīñ fikr hai saḌak kī mujhe"

"zabāñ pe harf to inkār meñ nahīñ aatā ye marhala hī kabhī pyaar meñ nahīñ aatā khulegā un pe jo bainassutūr paḌhte haiñ vo harf harf jo aḳhbār meñ nahīñ aatā samajhne vaale yaqīnan samajh hī lete haiñ hamārā dard jo iz.hār meñ nahīñ aatā ye ḳhāndān hamārā bikhar gayā jab se maza hameñ kisī tyauhār meñ nahīñ aatā hamāre haq meñ to vo chāñd aur sūraj hai bahut dinoñ se jo dīdār meñ nahīñ aatā kamāl ye hai ki ham ḳhvāb dekhte hī nahīñ ki ḳhvāb dīda-e-bedār meñ nahīñ aatā hamārā sher samajhne kī kuchh to koshish kar ye kyā navishta-e-dīvār meñ nahīñ aatā qalam kī kaaT to talvār se bhī baḌh kar hai magar shumār ye hathiyār meñ nahīñ aatā vo apnā zauq baḌhā.eñ agar maza un ko ra.uuf 'ḳhair' ke ash.ār meñ nahīñ aatā"

"giraftārī ke sab harbe shikārī le ke niklā hai parinda bhī shikārī kī supārī le ke niklā hai nikalne vaalā ye kaisī savārī le ke niklā hai madārī jaise sāñpoñ kī piTārī le ke niklā hai bahar-qīmat vafādārī hī saarī le ke niklā hai hathelī par agar vo jaan pyārī le ke niklā hai safari suiT meñ TaTa safari le ke niklā hai vo lekin zehn o dil par bojh bhārī le ke niklā hai yaqīnan hijratoñ kī jānkārī le ke niklā hai agar apne hī ghar se be-qarārī le ke niklā hai khilaune kī taḌap meñ ḳhud khilaunā vo na ban jaa.e mirā bachcha saḌak par rezgārī le ke niklā hai agar duniyā bhī mil jaa.e rahegā haath phailā.e ajab kashkol duniyā kā bhikārī le ke niklā hai ḳhatā-kārī mirī ummīd-vār-e-dāman-e-rahmat magar muftī to qur.ān o buḳhārī le ke niklā hai jhalaktā hai mizāj-e-shahryārī har bun-e-mū se ba-zāhir 'ḳhair' harf-e-ḳhāksārī le ke niklā hai"