Bachpan

ghar se masjid hai bahut duur chalo yuuñ kar leñ
kisī rote hue bachche ko hañsāyā jaa.e

jugnū ko din ke vaqt parakhne kī zid kareñ
bachche hamāre ahd ke chālāk ho ga.e

ham tire shauq meñ yuuñ ḳhud ko gañvā baiThe haiñ
jaise bachche kisī tyauhār meñ gum ho jaa.eñ

har vaqt kase rahte haiñ maaoñ kī piiTh se
godī meñ nahīñ khelte mazdūr ke bachche

uḌne do parindoñ ko abhī shoḳh havā meñ
phir lauT ke bachpan ke zamāne nahīñ aate

ajab kyā hai jo nau-ḳhezoñ ne sab se pahle jāneñ diiñ
ki ye bachche haiñ in ko jald so jaane kī aadat hai

faqat māl-o-zar-e-dīvār-o-dar achchhā nahīñ lagtā
jahāñ bachche nahīñ hote vo ghar achchhā nahīñ lagtā

ka.ī din se sharārat hī nahīñ kī
mire andar kā bachcha lāpata hai

vo qaht-e-muḳhlisī hai ki yāroñ kī bazm se
ġhībat nikāl deñ to faqat ḳhāmushī bache

bachpan kitnā pyārā thā jab dil ko yaqīñ aa jaatā thā
marte haiñ to ban jaate haiñ āsmān ke taare log

ai shaiḳh marte marte bache haiñ piye baġhair
aasī hoñ ab jo tauba kareñ mai-kashī se ham

nikalne hī nahīñ detī haiñ ashkoñ ko mirī āñkheñ
ki ye bachche hamesha maañ kī nigarānī meñ rahte haiñ

collage ke sab bachche chup haiñ kāġhaz kī ik naav liye
chāroñ taraf dariyā kī sūrat phailī huī bekārī hai

mirā rotā bachcha bahaltā thā jis se
vo lakḌī kā hāthī uThā le gayā vo

log kahte haiñ hamesha chāñd sā mahbūb ko
bhūke bachche ko magar roTī lagī hai chāñd sī

ik khilaunā jogī se kho gayā thā bachpan meñ
DhūñDhtā phirā us ko vo nagar nagar tanhā

kis kī sadā fazāoñ meñ gūñjī hai chār-sū
kis ne mujhe pukārā hai bachpan ke naam se

khilaune kī taḌap meñ ḳhud khilaunā vo na ban jaa.e
mirā bachcha saḌak par rezgārī le ke niklā hai

jo bhiik māñgte hue bachche ke paas thā
us kāsa-e-savāl ne sone nahīñ diyā

shoḳhī kisī meñ hai na sharārat hai ab 'obaid'
bachche hamāre daur ke sanjīda ho ga.e