kyaa kyaa na paDhaa is maktab mein, kitne hi hunar sikhe hain yahaan — Ajmal Siddiqui

har ek subh vazu karti hain miri aankhein
ki shaayad aaj to aa jaae vo habib nazar

bol paDtaa to miri baat miri hi rahti
khaamushi ne hain diye sab ko fasaane kyaa kyaa

jis din se gayaa vo jaan-e-ghazal har misre ki surat bigDi
har lafz pareshaan dikhtaa hai, is darja varaq namnaak huaa

kabhi khauf thaa tire hijr kaa kabhi aarzu ke zavaal kaa
rahaa hijr-o-vasl ke darmiyaan tujhe kho sakaa na main paa sakaa

vo meraa ho ki na ho kyaa gharaz mujhe is se
havas charaagh ki tum ko mujhe hai bhaataa nuur

aas pe teri bikhraa detaa huun kamre ki sab chizein
aas bikharne par sab chizein khud hi uThaa ke rakhtaa huun