Rooh

ranjish hī sahī dil hī dukhāne ke liye aa
aa phir se mujhe chhoḌ ke jaane ke liye aa

yuuñ to qadam qadam pe hai dīvār sāmne
koī na ho to ḳhud se ulajh jaanā chāhiye

band kar ke mirī āñkheñ vo sharārat se hañse
būjhe jaane kā maiñ har roz tamāshā dekhūñ

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ

ishrat-e-qatra hai dariyā meñ fanā ho jaanā
dard kā had se guzarnā hai davā ho jaanā

hindostāñ meñ dhuum hai kis kī zabān kī
vo kaun hai 'riyāz' ko jo jāntā nahīñ

umr bhar kaun nibhātā hai ta'alluq itnā
ai mirī jaan ke dushman tujhe allāh rakkhe

nikal kar dair-o-ka.aba se agar miltā na but-ḳhāna
to Thukrā.e hue insāñ ḳhudā jaane kahāñ jaate

tire va.ade par jiye ham to ye jaan jhuuT jaanā
ki ḳhushī se mar na jaate agar e'tibār hotā

tū mohabbat se koī chaal to chal
haar jaane kā hausla hai mujhe

hai kā.enāt ko harakat tere zauq se
partav se āftāb ke zarre meñ jaan hai

jāntā hai ki vo na ā.eñge
phir bhī masrūf-e-intizār hai dil

vasl ke din shab-e-hijrāñ kī haqīqat mat pūchh
bhuul jaanī hai mujhe sub.h kuuñ phir shaam kī baat

dil se miTnā tirī añgusht-e-hinā.ī kā ḳhayāl
ho gayā gosht se nāḳhun kā judā ho jaanā

na jaane kis liye ummīd-vār baiThā huuñ
ik aisī raah pe jo terī rahguzar bhī nahīñ

jaane kis aalam meñ tū bichhḌā ki hai tere baġhair
aaj tak har naqsh fariyādī mirī tahrīr kā

zamāna saḳht kam-āzār hai ba-jān-e-asad
vagarna ham to tavaqqo zyāda rakhte haiñ

hai kyā jo kas ke bāñdhiye merī balā Dare
kyā jāntā nahīñ huuñ tumhārī kamar ko maiñ

uqābī ruuh jab bedār hotī hai javānoñ meñ
nazar aatī hai un ko apnī manzil āsmānoñ meñ

maiñ bhī palkoñ pe sajā lūñgā lahū kī būñdeñ
tum bhī pā-basta-e-zanjīr-e-hinā ho jaanā