Subah

ye ham jo peT se hi sochte hain shaam o sahar
kabhi to jaaeinge is daal-bhaat se aage

phir sar-e-subh kisi dard ke dar vaa karne
dhaan ke khet se ik mauj-e-havaa aai hai

kab Thahregaa dard ai dil kab raat basar hogi
sunte the vo aaeinge sunte the sahar hogi

ye daagh daagh ujaalaa ye shab-gazida sahar
vo intizaar thaa jis kaa ye vo sahar to nahin

jo nafas thaa khaar-e-gulu banaa jo uThe the haath lahu hue
vo nashaat-e-aah-e-sahr gai vo vaqaar-e-dast-e-duaa gayaa

tum aae ho na shab-e-intizaar guzri hai
talaash mein hai sahar baar baar guzri hai

muntazir us ke dilaa taa-ba-kujaa baiThnaa
shaam hui ab chalo subh phir aa baiThnaa

use subh-e-azal inkaar ki jurat hui kyunkar
mujhe maalum kyaa vo raaz-daan teraa hai yaa meraa

aankhon mein meri subh-e-qayaamat gai jhamak
siine se us pari ke jo parda ulaT gayaa

dil ki betaabi nahin Thaharne deti hai mujhe
din kahin raat kahin subh kahin shaam kahin

kaav kaav-e-sakht-jaani haae-tanhaai na puchh
subh karnaa shaam kaa laanaa hai ju-e-shir kaa

rang-e-shikasta subh-e-bahaar-e-nazaara hai
ye vaqt hai shaguftan-e-gul-haa-e-naaz kaa

raat pi zamzam pe mai aur subh-dam
dhoe dhabbe jaama-e-ehraam ke

ham ahl-e-qafas tanhaa bhi nahin har roz nasim-e-subh-e-vatan
yaadon se moattar aati hai ashkon se munavvar jaati hai

haan dikhaa de ai tasavvur phir vo subh o shaam tu
dauD pichhe ki taraf ai gardish-e-ayyaam tu

'attaar' ho 'rumi' ho 'raazi' ho 'ghazaali' ho
kuchh haath nahin aataa be-aah-e-sahar-gaahi

jab tujhe yaad kar liyaa subh mahak mahak uThi
jab tiraa gham jagaa liyaa raat machal machal gai

vasl ke din shab-e-hijraan ki haqiqat mat puchh
bhuul jaani hai mujhe subh kuun phir shaam ki baat

qulqul-e-minaa sadaa naaqus ki shor-e-azaan
ThanDe ThanDe didani hai garmi-e-baazaar-e-subh

vasl ki raat ke sivaa koi shaam
saath le kar sahar nahin aati