kyaa kahun kyaa surur paayaa hai — Ameen Tirmizi

main ye aankhein bhi tiri nazr to kar duun lekin
teri tasvir inhein dekhti rahti hai bahut

tamaam shahr gale lag gayaa to kyaa haasil
vo ham ko munh jo lagaae to eid ho jaae

zhaala-baari se khauf aataa hai
un ki aamad kahin na Tal jaae

tum se kahaa thaa baam pe mat jaanaa aaj shaam
dekhaa naan saare shahr ki to eid ho gai

main jab jab bhi kisi kaaghaz pe teraa naam likhtaa huun
chamak tahrir se aur mahak kaaghaz se aati hai

sar-ba-kaf khud hi main maqtal mein chalaa aaya huun
log kahte hain ki vo shokh hai shamshir-ba-kaf