Khof

ḳhud apne se milne kā to yaarā na thā mujh meñ
maiñ bhiiḌ meñ gum ho ga.ī tanhā.ī ke Dar se

dil hī to hai siyāsat-e-darbāñ se Dar gayā
maiñ aur jā.ūñ dar se tire bin sadā kiye

gar baazī ishq kī baazī hai jo chāho lagā do Dar kaisā
gar jiit ga.e to kyā kahnā haare bhī to baazī maat nahīñ

ġhair taraf kyūñki nazar kar sakūñ
ḳhauf hai tujh ishq ke jāsūs kā

mere ghar meñ ġhair ke Dar se kabhī chhup jā.iye
ġhair ke ghar meñ chhupe the aaj kis kī Dar se aap

Dar hai na dupaTTa kahīñ siine se sarak jaa.e
pañkhā bhī hameñ paas se jhalne nahīñ dete

hai kyā jo kas ke bāñdhiye merī balā Dare
kyā jāntā nahīñ huuñ tumhārī kamar ko maiñ

vo butoñ ne Daale haiñ vasvase ki diloñ se ḳhauf-e-ḳhudā gayā
vo paḌī haiñ roz qayāmateñ ki ḳhayāl-e-roz-e-jazā gayā

ham shaiḳh na leader na musāhib na sahāfī
jo ḳhud nahīñ karte vo hidāyat na kareñge

kyā mazā detī hai bijlī kī chamak mujh ko 'riyāz'
mujh se lipTe haiñ mire naam se Darne vaale

hālāt se ḳhauf khā rahā huuñ
shīshe ke mahal banā rahā huuñ

chehre se jhaaḌ pichhle baras kī kudūrateñ
dīvār se purānā calender utaar de

dil ko tirī chāhat pe bharosa bhī bahut hai
aur tujh se bichhaḌ jaane kā Dar bhī nahīñ jaatā

Darātā hai hameñ mahshar se tū vaa.iz are jā bhī
ye hañgāme to ham ne roz kū-e-yār meñ dekhe

ḳhudā ko kaam to sauñpe haiñ maiñ ne sab lekin
rahe hai ḳhauf mujhe vaañ kī be-niyāzī kā

in laboñ kā lahū na pī jā.ūñ
apnī tishna-labī se ḳhatra hai

maiñ kahūñ kis tarah ye baat us se
tujh ko jānam mujhī se ḳhatra hai

mujhe ab tum se Dar lagne lagā hai
tumheñ mujh se mohabbat ho ga.ī kyā

ab nahīñ koī baat ḳhatre kī
ab sabhī ko sabhī se ḳhatra hai

andar se maiñ TūTā-phūTā ek khañDar vīrāna thā
zāhir jo ta.amīr na hotī to maiñ yaaro kyā kartā