Maa

sau sau umīdeñ bañdhtī hai ik ik nigāh par
mujh ko na aise pyaar se dekhā kare koī

dil nā-umīd to nahīñ nākām hī to hai
lambī hai ġham kī shaam magar shaam hī to hai

kabhī kisī ko mukammal jahāñ nahīñ miltā
kahīñ zamīn kahīñ āsmāñ nahīñ miltā

rahī na tāqat-e-guftār aur agar ho bhī
to kis umiid pe kahiye ki aarzū kyā hai

yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo

na būjho āsmāñ par tum sitāre
hamārī aah kī chingāriyāñ haiñ

na jaane kis liye ummīd-vār baiThā huuñ
ik aisī raah pe jo terī rahguzar bhī nahīñ

kufr-o-īmāñ do nadī haiñ ishq kiiñ
āḳhirash dono kā sañgam hovegā

āsmāñ par koī tasvīr banātā huuñ 'zafar'
ki rahe ek taraf aur lage chāroñ taraf

zarā jo ham ne unheñ aaj mehrbāñ dekhā
na ham se pūchhiye kyā rañg-e-āsmāñ dekhā

bāzār-e-bosa tez se hai tez-tar 'zafar'
ummīd to nahīñ ki ye mahñgā.ī ḳhatm ho

dar-e-umīd se ho kar nikalne lagtā huuñ
to yaas rauzan-e-zindāñ se aañkh mārtī hai

dil le gayā hai mujh kuuñ de ummīd-e-dil-dahī
zālim kabhī to lā.egā merā liyā huā

nākāmi-e-nigāh hai barq-e-nazārā-soz
tū vo nahīñ ki tujh ko tamāshā kare koī

ek be-chehra sī ummīd hai chehra chehra
jis taraf dekhiye aane ko hai aane vaalā

munhasir marne pe ho jis kī umiid
nā-umīdī us kī dekhā chāhiye

maiñ nā-murād dil kī tasallī ko kyā karūñ
maanā ki tere ruḳh se nigah kāmyāb hai

kī mire qatl ke baa'd us ne jafā se tauba
haa.e us zūd-pashīmāñ kā pashīmāñ honā

'faiz' thī raah sar-ba-sar manzil
ham jahāñ pahuñche kāmyāb aa.e

masjid to banā dī shab bhar meñ īmāñ kī harārat vāloñ ne
man apnā purānā paapī hai barsoñ meñ namāzī ban na sakā