gul to gul khaar pe dekhi jo kabhi garm shu'aa' — Bismil Saeedi

husn bhi kambakht kab khaali hai soz-e-ishq se
shama bhi to raat bhar jalti hai parvaane ke saath

— Bismil Saeedi

dohraai jaa sakegi na ab daastaan-e-ishq
kuchh vo kahin se bhuul gae hain kahin se ham

— Bismil Saeedi

tum jab aate ho to jaane ke liye aate ho
ab jo aa kar tumhein jaanaa ho to aanaa bhi nahin

— Bismil Saeedi

sukun nasib huaa ho kabhi jo tere baghair
khudaa kare ki mujhe tu kabhi nasib na ho

— Bismil Saeedi

ro rahaa huun aaj main saare jahaan ke saamne
roegaa kal dekhnaa saaraa jahaan mere liye

— Bismil Saeedi

kaabe mein musalmaan ko kah dete hain kaafir
but-khaane mein kaafir ko bhi kaafar nahin kahte

— Bismil Saeedi

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

sabza o gul kahaan se aae hain
abr kyaa chiiz hai havaa kyaa hai

— Mirza Ghalib

chaand ne taan li hai chaadar-e-abr
ab vo kapDe badal rahi hogi

— Jaun Elia

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani

tum ne kyuun dil mein jagah di hai buton ko 'saabir'
tum ne kyuun kaaba ko but-khaana banaa rakkhaa hai

— Fazal Husain Sabir