sar miraa kaaT ke pachhtaaiyegaa — Dagh Dehlvi

hazrat-e-'daagh' hai ye kucha-e-qaatil uThiye
jis jagah baiThte hain aap to jam jaate hain

dil hi to hai na aae kyuun dam hi to hai na jaae kyuun
ham ko khudaa jo sabr de tujh saa hasin banaae kyuun

baad muddat ke ye ai 'daagh' samajh mein aayaa
vahi daanaa hai kahaa jis ne na maanaa dil kaa

na ronaa hai tariqe kaa na hansnaa hai saliqe kaa
pareshaani mein koi kaam ji se ho nahin saktaa

mujh gunahgaar ko jo bakhsh diyaa
to jahannam ko kyaa diyaa tu ne

kal tak to aashnaa the magar aaj ghair ho
do din mein ye mizaaj hai aage ki khair ho