Shayari Of Dagh Dehlvi

hazāroñ kaam mohabbat meñ haiñ maze ke 'dāġh'
jo log kuchh nahīñ karte kamāl karte haiñ

nahīñ khel ai 'dāġh' yāroñ se kah do
ki aatī hai urdu zabāñ aate aate

aa.ina dekh ke kahte haiñ sañvarne vaale
aaj be-maut mareñge mire marne vaale

ḳhuub parda hai ki chilman se lage baiThe haiñ
saaf chhupte bhī nahīñ sāmne aate bhī nahīñ

shab-e-visāl hai gul kar do in charāġhoñ ko
ḳhushī kī bazm meñ kyā kaam jalne vāloñ kā

is nahīñ kā koī ilaaj nahīñ
roz kahte haiñ aap aaj nahīñ

ġhazab kiyā tire va.ade pe e'tibār kiyā
tamām raat qayāmat kā intizār kiyā

lipaT jaate haiñ vo bijlī ke Dar se
ilāhī ye ghaTā do din to barse

na jaanā ki duniyā se jaatā hai koī
bahut der kī mehrbāñ aate aate

jis meñ lākhoñ baras kī hūreñ hoñ
aisī jannat ko kyā kare koī

kal tak to āshnā the magar aaj ġhair ho
do din meñ ye mizāj hai aage kī ḳhair ho

tumhārā dil mire dil ke barābar ho nahīñ saktā
vo shīsha ho nahīñ saktā ye patthar ho nahīñ saktā