Khushi

baḌe baḌe ġham khaḌe hue the rasta roke rāhoñ meñ
chhoTī chhoTī ḳhushiyoñ se hī ham ne dil ko shaad kiyā

jis khet se dahqāñ ko mayassar nahīñ rozī
us khet ke har ḳhosha-e-gandum ko jalā do

vo to ḳhush-bū hai havāoñ meñ bikhar jā.egā
mas.ala phuul kā hai phuul kidhar jā.egā

ab ḳhushī hai na koī dard rulāne vaalā
ham ne apnā liyā har rang zamāne vaalā

jo ḳhushāmad kare ḳhalq us se sadā raazī hai
sach to ye hai ki ḳhushāmad se ḳhudā raazī hai

mirī jaan aaj kā ġham na kar ki na jaane kātib-e-vaqt ne
kisī apne kal meñ bhī bhuul kar kahīñ likh rakhī hoñ masarrateñ

maiñ aaj zad pe agar huuñ to ḳhush-gumān na ho
charāġh sab ke bujheñge havā kisī kī nahīñ

tire va.ade par jiye ham to ye jaan jhuuT jaanā
ki ḳhushī se mar na jaate agar e'tibār hotā

sitam to ye hai ki vo bhī na ban sakā apnā
qubūl ham ne kiye jis ke ġham ḳhushī kī tarah

raqs karne kā milā hukm jo dariyāoñ meñ
ham ne ḳhush ho ke bhañvar bāñdh liyā paañv meñ

yuuñ lage dost tirā mujh se ḳhafā ho jaanā
jis tarah phuul se ḳhushbū kā judā ho jaanā

rafāqatoñ ke na.e ḳhvāb ḳhushnumā haiñ magar
guzar chukā hai tire e'tibār kā mausam

ġham mujhe dete ho auroñ kī ḳhushī ke vāste
kyuuñ bure bante ho tum nāhaq kisī ke vāste

kise ḳhabar ki safīne Dubo chukī kitne
faqīh o suufī o shā.ir kī nā-ḳhush-andeshī

aks-e-ḳhushbū huuñ bikharne se na roke koī
aur bikhar jā.ūñ to mujh ko na sameTe koī

ahbāb ko de rahā huuñ dhokā
chehre pe ḳhushī sajā rahā huuñ

ab tak dil-e-ḳhush-fahm ko tujh se haiñ umīdeñ
ye āḳhirī sham.eñ bhī bujhāne ke liye aa

in ābloñ se paañv ke ghabrā gayā thā maiñ
jī ḳhush huā hai raah ko pur-ḳhār dekh kar

kabhī kabhār use dekh leñ kahīñ mil leñ
ye kab kahā thā ki vo ḳhush-badan hamārā ho

ek hañgāme pe mauqūf hai ghar kī raunaq
nauha-e-ġham hī sahī naġhma-e-shādī na sahī