log yuun dekh ke hans dete hain — Ehsan Danish Kandhlvi

kuchh log jo savaar hain kaaghaz ki naav par
tohmat taraashte hain havaa ke dabaav par

tum saada-mizaaji se miTe phirte ho jis par
vo shakhs to duniyaa mein kisi kaa bhi nahin hai

main hairaan huun ki kyuun us se hui thi dosti apni
mujhe kaise gavaara ho gai thi dushmani apni

shorish-e-ishq mein hai husn baraabar kaa sharik
soch kar jurm-e-tamannaa ki sazaa do ham ko

ham chaTaanein hain koi ret ke saahil to nahi
shauq se shahr-panaahon mein lagaa do ham ko

kis kis ki zabaan rokne jaaun tiri khaatir
kis kis ki tabaahi mein tiraa haath nahin hai