Motivational

dil meñ na ho jur.at to mohabbat nahīñ miltī
ḳhairāt meñ itnī baḌī daulat nahīñ miltī

rahī na tāqat-e-guftār aur agar ho bhī
to kis umiid pe kahiye ki aarzū kyā hai

dil se jo baat nikaltī hai asar rakhtī hai
par nahīñ tāqat-e-parvāz magar rakhtī hai

zindagī phailī huī thī shām-e-hijrāñ kī tarah
kis ko itnā hausla thā kaun jī kar dekhtā

sādgī o purkārī be-ḳhudī o hushyārī
husn ko taġhāful meñ jur.at-āzmā paayā

tū mohabbat se koī chaal to chal
haar jaane kā hausla hai mujhe

subūt-e-ishq kī ye bhī to ek sūrat hai
ki jis se pyaar kareñ us pe tohmateñ bhī dhareñ

kyuuñ jal gayā na tāb-e-ruḳh-e-yār dekh kar
jaltā huuñ apnī tāqat-e-dīdār dekh kar

dil ko niyāz-e-hasrat-e-dīdār kar chuke
dekhā to ham meñ tāqat-e-dīdār bhī nahīñ

har ek baat ko chup-chāp kyuuñ sunā jaa.e
kabhī to hausla kar ke nahīñ kahā jaa.e

'nazīr' terī ishāratoñ se ye bāteñ ġhairoñ kī sun rahā hai
vagarna kis meñ thī tāb-o-tāqat jo us se aa kar kalām kartā

hausla kis meñ hai yūsuf kī ḳharīdārī kā
ab to mahñgā.ī ke charche haiñ zuleḳhāoñ meñ

ise bhī 'zafar' merī himmat hī samjho
kahīñ ho na paayā kahīñ ho gayā huuñ

use sub.h-e-azal inkār kī jur.at huī kyūñkar
mujhe mālūm kyā vo rāz-dāñ terā hai yā merā

ġhalatī-hā-e-mazāmīñ mat pūchh
log naale ko rasā bāñdhte haiñ

vo bahut chālāk hai lekin agar himmat kareñ
pahlā pahlā jhuuT hai us ko yaqīñ aa jā.egā

thā irāda tirī fariyād kareñ hākim se
vo bhī ai shoḳh tirā chāhne vaalā niklā

soch ko jur.at-e-parvāz to mil lene do
ye zamīñ aur hameñ tañg dikhā.ī degī

nisyah-o-naqd-e-do-ālam kī haqīqat mālūm
le liyā mujh se mirī himmat-e-ālī ne mujhe

be-ishq umr kaT nahīñ saktī hai aur yaañ
tāqat ba-qadr-e-lazzat-e-āzār bhī nahīñ